专访｜Zpecial唔够胆斋夹band　获Dear Jane教路点挨：缘份到就得

Zpecial早年仍是独立乐队时，公司除4名成员（康聪、Mike、Tatming、Waiyin）外，就只得经理人以及监制。康聪说那时要兼顾埋约访问、落广告，甚至有时因资源问题，令不少作品无法面世。

去年加盟华纳，下月将在麦花臣开骚， 可以说是一个成果展，紧张在所难免，幸好4子亦懂得自我调节:“有几多个观众嚟都好，都要尽力表演，希望靠佢哋话畀其他人知有几精彩。”

Zpecial加盟华纳的时间，正值疫情肆虐，但或许是人人在家工作，令更多人认识他们：“我哋嘅音乐project有啲题材都系源自疫情，而《深夜告别练习》都系𠮶段时间出嚟嘅作品。虽然冇咁多演出，但又多咗人接触我哋，算唔算赚咗？可能系蚀咗都唔定，哈哈！”康聪说以前“蚊形”公司，创作少不免会受资源所限，如今会被公司追歌，转一个角度来想其实几幸福，所以就算疫情期间没有太多创作灵感，都会用尽办法“交啲嘢出嚟”。“会痛苦、会闷，但点都要做，工作永远都系有辣有唔辣。”

更何况他们是打两份工，双重嘅辣，Waiyin直言辛苦，但点都系值得：“大家都会攰，你要balance屋企人、伴侣、自己嘅时间。上星期见到同事排行程，开骚之前都冇假放，之后亦有其他骚，唔辛苦系假嘅，但如果唔钟意音乐，都唔会入呢间公司，睇下你可以牺牲几多。”如果要由低程度数起，Tatming认为是日头返工，夜晚收工夹band，牺牲了休息时间，至于高级程度的话，Waiyin说：“屋企人生日去唔到食饭、屋企人有事入医院你都去唔到帮手。”可曾被屋企人埋怨？他们都说自己比较幸运，并笑指“唔出声就当系支持”，Tatming甚至怀疑屋企人至今仍然不理解自己所做的一切，但每次Zpecial开骚都会撑场。

Tatming说不是没有想过全身投入音乐事业，但毕竟夹band都要钱，所以只能维持现况。同公司嘅Dear Jane当年都系穷住夹band，无钱嘅日子索性留喺band房打机，Tatming说：“佢哋对我哋嚟讲系好励志，Jackal都有同我讲以前点挨，原来大家都系咁顶住，佢成日叫我唔好谂咁多，出多啲骚、出多啲歌，缘份到就得㗎啦，我唔知佢hea我定点，但又真系几啱。”

Hair : Haysses Ip @ HAiR

make up : hongjai_makeup