AK江𤒹生否认封咪《冰上火花》后会出歌：拍完会专注返音乐

江𤒹生（AK）、陈卓贤（Ian）以及陈蕾（豹哥）将于5月14日于亚博举行拉阔音乐会，三位今日（10/3）现身铜锣湾时代广场出席音乐会记招，吸引约500名粉丝到场支持，商场的二、三楼都迫满人，场面热闹虚冚。活动上，他们即席大骚画功，为对方的歌曲设计舞台，Ian收到AK为自己设计的《再见宁静海》舞台时露出嫌弃表情，相当搞笑。

三位接受访问时表示非常期待今次合作，豹哥说：“唔知佢哋啲歌加咗女声系点，《地球上的最后一朵花》我都可以一齐Hoah-eh-oh，都好期待。”Ian随即透露当初写《地球上的最后一朵花》时曾幻想有一把女声：“而家美梦成真，可以一齐合唱。”

AK早前宣布暂时唔出歌，令一众粉丝非常担心，他今日就大派定心丸：“呢几月特登封一封咪，养一养把声，希望到时有好表现。其实佢哋get错咗，我只系话拍完嘢先，因为《冰上火花》太chur冇时间录新歌，拍完就会专注返喺音乐度，封咪呢两个字系大家加畀我㗎啫”，更透露希望可以赶得切在拉阔音乐会前出新歌。

Ian亦因为拍剧导致手部轻微受伤，他表示冇咩事：“以前做惯运动员，真系好少事。”比起擦损，Ian坦言唔够瞓仲大件事：“呢个攰啲，以前做运动员一日瞓十个钟，消耗好多体力，呢排都系，上冰面要溜十几个钟，而家开始对脚有啲麻木咗所以都OK。”早前生病的Ian笑言同剧演员戥自己高兴：“佢哋听到Ian病咗，第一个反应系‘咁就好啦’，觉得我终于可以休息下，（AK：几时到我病）放咗几日病假就快啲返去继续。”

今次与Ian和AK合作，豹哥笑言收到很多朋友请求帮忙买飞：“平时自己开都冇乜人问我攞飞，全部已读不回住先啦，或者今次主办唔系自己公司，有少少难攞呀，因为太多啦实在。”访问期间，豹哥夹在两位男神中间听着他们一唱一和，问到会否觉得被轰炸时，她搞笑指：“都好过公司𠮶两个，我几enjoy听，因为觉得几新鲜咁样嘅对话，好钟意佢哋嘅状态，一个攻击，一个就沉默咁反击，夹喺中间都听得好开心。”