被艾粒性取向同职场歧视　余迪伟开记招回应：佢哋以后唔好再咁玩

由甄子康（少爷占）及唐剑康（当奴）组成的艾粒昨晚（9日）举行演唱会，期间在荧幕上展示余迪伟的半裸照公开取笑。迪伟得悉事件后随即在Instagram爆Seed发文闹爆艾粒“系性取向歧视同埋职场歧视！”。由于事件持续发酵，艾粒于今日（10日）下午出Post向迪伟道歉，而迪伟亦于下午4点在商台举行记者会回应此事。

迪伟在记者会详细交待事件，并指自己忍气吞声多年，觉得是时候发声。期间亦分享了一位前度，因为受到歧视最后选择自杀，自己亦因而耿耿于怀多年：“我系好无所谓嘅人，我做人亦都非常光明磊落，但经过今次，我嘅嬲唔单只系要为自己发声，我亦都要为一众受到任何歧视嘅人发声。”对于艾粒公开道歉，迪伟直言一定会原谅对方，并指道歉真诚。问到会否要求两人当面道歉？迪伟表示不会，又或者待两人完成演唱会再说：“佢哋以后唔好再咁玩，或者玩任何人，亦都唔系净系佢哋，希望所有人，任何歧视都唔啱。”

提到哑忍多年，迪伟指过去多年一直都被艾粒以“迪伟后花园”及“迪伟俱乐部”来取笑，有粉丝曾经投诉及去信平机会，而艾粒亦知情。被问到更艾粒是否还是朋友，迪伟直言：“可以算系㗎，如果佢哋当我系，我无所谓㗎。（有冇介意佢哋喺你IG偷你啲相嚟用？）呢个反而唔系最大介意，你Post得出嚟，预咗人用。（觉得佢两个本身系咪歧视同性恋者？）呢个我唔批评喇，我喺呢件事觉得佢唔应该咁玩啫。（今次出嚟讲，系咪因为《给十九岁的我》启发？）完全唔关事，唔好相提并论。”

问到为何要等这么多年后才发声，迪伟坦言：“系时候要Stop，以后唔好再做。（佢哋系商台高层，怕唔怕以后影响工作？）都要面对，咁大把行出嚟讲平权嘅人之后都会有啲不幸都唔顶，你话我勇敢又好，要出声都好，我觉得系要做。”至于可会因此事而与艾粒产生芥蒂？迪伟认为不会：“工作还工作，喺职场上如果有朋友系Bonus嚟嘅，职场上唔系朋友咪点吓头，讲句早晨，买吓Lunch无所谓，食吓饭都得。”

另外，迪伟又提到早前出席商台举办的慈善篮球赛事，被两位壮男擡出场，当时艾粒嘲：“迪伟掂过个波好污糟，你哋唔好掂。”虽然当时自己不觉得是一回事，反而粉丝向他反映太过份，更去信平机会投诉。

其后迪伟更透露一段往事令自己感觉非常差：“曾经有同事带小朋友嚟公司玩，小朋友同我玩嘅时候，同事老公就叫小朋友唔好同呢个哥哥玩，话哥哥玩嘅嘢同我哋唔同，佢玩后面。我就同小朋友讲，佢当时只有一、两岁，亦都系讲畀佢爸爸妈妈听，叫佢喺呢种父母底下要小心成长。”