万千星辉2022任噏乱评｜TVB成功呼应主题　大胆起用周奕玮抵赞

无线（TVB）《万千星辉颁奖典礼2022》在昨日（8/1）举行，大家对赛果满唔满意？今次想同大家讨论嘅并唔系赛果，虽然林敏骢无奖大家都会好唔满意，但陈山聪同周嘉洛又唔可以话系好离谱，所以唯有选举相信TVB嘅机制，又或者咁讲，咁多年TVB颁奖礼一直都系咁，从来唔能够满足咁多位观众，今年算系大部份都值得认同。

👇👇👇点选下图睇全部赛果👇👇👇

咁唔讲赛果，讲咩好？讲成个骚个流程。上年其实已经赞过TVB，自总经理曾志伟入主后，真系想改革颁奖礼模式，至少在颁奖嘉宾方面下过苦功。上年已经请咗唔少TVB前辈返嚟颁奖，刘江、罗家英、罗冠兰等等，今年卡士仲劲！包括任达华、张艾嘉、叶童、黄日华、苗侨伟（三哥）、吕良伟、郭可盈、郑则仕等等，靠嘅都系曾生碌人情卡，绝对系值得一赞嘅地方。

成个骚节奏尚算明快，但总有啲位令人觉得“多咗”，好似请马国明、江美仪、陈炜和陈展鹏上台对后辈讲出感觉，明显想煽情，但同样桥段在台庆已经类似上演过，同一招短时间又用多一次，观众眼泪唔系咁易呃。反而讲煽情，周奕玮开场白讲返各艺人嘅辛酸路，简单得嚟又直情，易动情嘅观众真系会隔湿湿。讲开周奕玮，唔能够唔赞吓佢，全场一个人做足司仪应该责任，稿都几长背得到，最后硬cut林敏骢发言恰到好处，畀时间幕后讲感言，有效果之余不失尊重。

Do姐离巢，过往大骚必不缺席，而且司仪点会用一个咁少？比起往年，就算要用周奕玮，都必定要有一位前辈带住，森美、阿Bob、陈贝儿呢啲，但今次TVB大胆起用周奕玮做独脚戏，呢点真系不得不赞，证明TVB唔系唔畀机会比较新嘅人。

讲起硬cut，成个骚最大败笔就系呢度，JW唱半首歌去咗广告，《超能使者》幕后讲感言又去广告，虽然大家都唔明去广告嘅重要性，但点解唔可以安排好啲，等大家讲嘅讲完唱嘅唱完先去广告呢？呢个做法真系欠缺尊重，作为一间咁大间嘅电视台，如果明知会出现over time时间，喺节目时间安排上系咪应该提早有部署？希望呢啲事系日后唔会再见到喇。

但讲到尾，今次颁奖礼其实已经做得好好，2022年TVB用上“传承·狂欢”，传承绝对系TVB需要进行的任务，而在今次颁奖礼上亦睇得出有呢个决心。得奖者出现较多以前少见嘅人，亦多咗唔少新生代，畀多啲机会、奖励一班后生，避免青黄不接呢个问题，成功为“传承”呢个主题，在2023年头，为2022年划上一个句号。