专访︱Zpecial叹在香港生存唔易　返兼职帮补生计：揾钱租Studio

乐队Zpecial于2009年组成、2018年经历过换人再集齐现有的人脚，直到今年加盟华纳唱片，四子形容他们的音乐路难行但总算顺利。由从前的六人（四子加经理人及监制）“蚊型”制作团队，到现时加入大公司推出新歌《Not the One（Neither of Us）》，他们认为两者最大的分别是宣传效果比以前大。资源丰富变相有更多掣肘？主音康聪完全不担心，表示音乐自主权依旧，“公司好放心将音乐部份，全权交咗畀Zpecial嘅团队去负责，我哋觉得非常之自由。”

新歌以另一角度睇Bad Boy　“可恨之人有可怜之处”

《Not the One（Neither of Us）》是Zpecial加盟华纳后推出的第二首作品，新歌讲述在一段错的爱情关系中，我们都倾向将责任归咎于对方，但又有没有想过，你可能亦曾经做错甚至无意中伤害过对方。康聪解释，“点解佢会成为俗称嘅bad boy或bad girl，可能佢俾人伤害过导致佢成为一个咁嘅人，可恨之人有可怜之处。”低音结他手Tatming补充，“新歌唔系想讲bad boy有几叻，只不过系用第二个角度睇bad boy。”

歌曲由康聪及鼓手Waiyin作曲及填上Rap词，问到新歌讲述的是否亲身经历？四子没有正面回应，Tatming仅表示，“系写城市围绕生活嘅事，朋友或者其他人都会经历嘅事。”康聪笑言，“可能经历咗都唔知，俾人玩过、伤害过一轮可能都唔知。”

凭独特音乐风格获邀加盟　与华纳一拍即合

回想起Zpecial于十多年前组队的情况，康聪说当时正就读中学，因为兴趣而开始夹Band。他表示当年是以“兴趣班”形式参与，直到2018年集齐现有人脚后，就决心要努力发展Zpecial，“（当年）兴趣使然时，大家就会有好多选择。有啲人钟意去工作、有啲想照顾多啲屋企，大家有唔同目标，Zpecial就换下人咁。到2018年，呢个人脚就齐喇，大家觉得可以发展下，就决定不如大家努力下、尝试下做呢件事。”

四子努力四年，凭着独特的音乐风格获华纳赏识邀请加盟，康聪重提在机缘巧合的情况下认识到华纳的同事，双方的发展方向一致促成合作契机。他形容与公司的关系是一拍即合、取长补短，“本身Zpecial系蚊型团队，六个人，我哋四个加经理人同监制。你话六个人嘅力量会唔会去到好远嘅地方？可能可以嘅，但我哋好多嘢都唔识，例如promotion、marketing，digital平台上嘅知识可能有啲欠缺。或者人手、资源嘅问题都未做得好完善。（同华纳）一拍即合，既然佢哋有我哋冇嘅嘢，不如合作下，取长补短。佢哋又欣赏我哋创作嘅音乐，我哋又真系想有人帮手，就合作咗啦。”

有不少从大公司跳出来做独立音乐人的，大概是想追求更大的自由度。问到Zpecial会否担心加盟大公司后变相有更多掣肘，康聪放心指，“当初倾合作模式时，佢哋（华纳）好重点话钟意我哋嘅音乐，觉得我哋嘅音乐好有自己嘅味道，所以先揾我哋。佢哋好放心将音乐部份，全权交咗畀Zpecial嘅团队去负责。音乐自主权嘅问题，so far暂时我哋觉得非常之自由。”

四子返兼职帮补生计　辛苦仍坚持全因“钟意”

“乐队喺香港乐坛生存容易吗？”，Tatming听到问题后轻叹说，“乐坛？要喺香港生存都唔容易啦，我哋除咗夹band之外都要返part-time，揾钱租studio。困唔困难呀？自己钟意嘅，几困难都会去做，每一行都有困难嘅时候，都挨得过嘅，我哋今时今日仲夹紧，ok嘅。”康聪续指，“唔好话乐队，香港嘅独立音乐人个个都好唔容易，唔只我哋，大家都好努力。”他们透露现时仍有返兼职帮补生计，要同时兼顾梦想与现实的确不容易，虽然过程辛苦，不过却单纯因为钟意而选择坚持，Tatming说，“见到你嘅音乐愈嚟愈多人听，见到个数据，咁就有少少动力不断推你，起码都开心，做嘅嘢唔系白费，呢个就系继续做落去嘅原因。”

曾经感到迷惘、曾经“唔知自己可以做啲乜”，康聪庆幸身边仍然有三位兄弟，在追梦的路上互相扶持，难行却总算顺利，“最感动个位系，我哋夹咗咁耐，喺2018年到而家，起起跌跌、经历咗咁多嘢，大家都仲喺度，呢件事已经系好感恩。佢（指向Waiyin）唔会走咗去、佢（指着Mike）都唔会走咗去，我哋都仲喺度，又可以接受你访问，已经好好啦。”

点撃睇更多专访照片：