胡定欣入TVB 20年最难挨时揾家人接济　黎诺懿再续约倾向幕后工作

不少TVB（无线）的艺员已经服务公司多年，就好似已服务20年的黎诺懿、胡定欣，他们昨日（30日）出席公司举行的长期服务暨杰出员工荣誉大奖颁奖典礼，回望这一路走过来非常不容易。

黎诺懿、胡定欣从艺员训练班毕业，一直待在TVB服务已有20年时间，对于不经不觉20年就过去，黎诺懿在接受《香港01》访问时表示：“时间过得好快，好似同定欣啱啱入行嘅感觉。好似做咗好多嘢，但又好似冇咩做过嘢，好奇妙嘅感觉，希望时间过得慢少少。”而在旁的定欣则笑言其实是做了很多事情：“挨咗好多眼泪，我谂过咗最辛苦嘅阶段，有一段时间真系几辛苦，但系好在𠮶时年轻有体力，精神上都好支持落去。（最辛苦阶段系？）𠮶时训练班已经唔需要交学费，公司只系畀一个交通费几千蚊，要揾屋企人再支持你啰，但都系要一个时间累积，喺一个行业里面。我哋入行个时系廿头，变相你仲要问屋企去支持你都唔容易啰。”扬言那个阶段是难挨的。

20年走过来一定有低潮时期，黎诺懿都曾想过放弃：“质疑自己系咪入错行，我哋两个普遍比较幸运，最迷失时候一定有人出嚟帮手，遇到好剧本好工作。”扬言不同阶段有不同想法。

而提到刚与公司续约两年时间，黎诺懿表示在现阶段只想做自己想做的事：“最想做剧集导演，用演员身份去导一个演员，嚟紧5年想做呢啲事。（续约金额满意？）大家开心，到我哋呢啲歳数除咗钱之外，好想做到自己想做嘅嘢。”自爆目前有一个大计划在实行中，届时大家就会知道。

另外，提到台庆颁奖礼将至，好朋友陈山聪今年是视帝大热，胡定欣都扬言力撑：“我今年就一定撑佢，呢位好兄弟见佢一路走来唔容易，见佢呢几年更加更加勤力，每时每刻都见佢开紧工，每一个角色畀心机去做好佢，我希望佢可以得到一个好成绩同回报。”