李佳芯挑剔自己做得未够好　认有不足：以前讲对白𦧲到人哋听唔到

有线电视主持出身的李佳芯（Ali），30岁才毅然转投无线（TVB）做演员，只用了短短6年时间就凭剧集《BB来了》成功登上视后宝座，大受观众欢迎！不过Ali近日接受常霖法师（叶青霖）访问时，直言一向对自己要求好高，甚至会挑剔自己，令压力倍增：“我本身就系一个会成日觉得呢样做得唔够好，呢样可以好啲，即系我永远都系会挑剔自己𠮶种人。”

Ali拍剧十年以来成功塑造了不少角色，演技备受肯定，但其实她在初期亦饱受网民抨击，质疑她的表现，Ali亦坦言难免受到打击：“我以前睇完我会唔开心㗎，当然一个新人出到嚟梗系会好介意人哋点样睇我嘅表现啦，所以我会睇啲留言，但每次睇到有人闹我又真系会唔开心。譬如以前啲人话我讲嘢好𦧲，可能我以前唔习惯用语言表达自己，尤其是一做角色嘅时候呢，我就会𦧲咗对白佢，有时情绪带动咗呢，我讲嘢就会好𦧲，讲对白好𦧲，𦧲到人哋听唔到，跟住我就留意返自己，我就会谂返点解我会咁呢？我讲对白真系唔系咁好，同埋有时可能有啲表情唔识得控制个力度，可能会有啲夸张咗，我会自己谂返同自己改善。”

虽然Ali曾因网民负评而大受打击，但她亦表示感激他们令自己积极改进，而现时的她已经学会调节心情：“原来challenge自己都系一个进步，但有时鼓励自己放手，过程都系一种享受嚟，两种唔同嘅享受同得着，我开始攞𠮶个平衡，同埋从演戏发觉，其实你有时愈执着，有时事与愿违，咁你谂嚟做乜啫？我哋演戏有度好就系我哋共同创作㗎，系所有嘢一齐㗎，只不过你系中间做戏𠮶个人，但其实唔系你一个人嘅功劳，唔系你最叻，你冇𠮶班人帮你摆一个咁嘅角度，你会影得靓？冇帮我遮遮眼灯，可能我已经好丑样，我只不过系其中一part，你唔好睇到自己咁大啰。总之我每一次个过程享受完，我有进步，有得着，可能大家开心，完成咗一个好开心嘅project，大家都合作得好好，口碑又唔错，有人钟意或者睇到有共鸣，对我嚟讲已经perfect喇，呢个就系完美啰！”