美丽战场大结局｜监制叶念琛亲解所有谜团 陈滢来电显示有玄机

昨晚播出的《美丽战场》大结局引起极大争议，不少网友觉得剧集留下太多问号，特别多人觉得剧集以开放式结局完结，有点解释得不圆满，《香港01》亦以电话访问监制叶念琛，他亲解大结局所有谜团，特别为何用开放式结局，他说：“我当然知道有几个位，观众会觉得好大争议性，第一个一定系open ending，但其实好多港剧都系open ending好似《流氓大亨》Do 姐最后流𠮶滴眼泪，《白色强人》李佳芯究竟有冇死到？我觉得系因为个热度，大家好投入啫，咁其实TVB好多剧都系open ending，我唔觉得呢个系好大胆嘅做法。”

部份角色已有完美结局

“我安排蒋家旻最后出返嚟之后就完，不过我明，大家好投入嘅时候，我系呢个位就完咗，我知大家会有好大反应，大家觉得意犹未尽最好，唔通结局又去返啲烧嘢食咩？但其实几个角色都有圆满结局，徐富贵（林盛斌饰演）、李静儿（刘佩玥饰）、钟家宝(陈滢饰)每个都有哂结局，方力申点解会失踪，我觉得呢个系一个趣味，起码大家知系道佢上船饮酒系揭发佢老豆（姜大卫饰）同朱晨丽嘅秘密，所以方力申先咁嬲。”

陈滢来电显示“老公”唔系方力申？

除了open ending 有争议外，监制叶念琛亦解一下最尾一场的伏线，“陈滢接到电话系咪佢老公打嚟？咁就要睇每个人点去阅读剧情，系咪佢老公（方力申）打嚟，或者唔系方力申打嚟都可以系呢个来电显示架，而蒋家旻问陈滢咁急去边？佢系咪知道陈滢揾紧方力申呢？我觉得蒋家旻再出现， 一定要有呢个shocking位，其实观众可以再阅读，唔系因为我懒惰，系我觉得剧情令到观众有联想系最好嘅，我只可以话绝对有哂材料，有晒伏线，可以有season 2，咁当然系睇大家想唔想有啦，唔系我话有就有，（徐富贵有喺花樽装cam?)呢个又两睇，花樽系佢送，但其他嘢唔系㖞。”

叶念琛：我唔觉烂尾

结局有多个悬念，令观众反应激烈，甚至有网民觉得烂尾，原来一切都是叶监制的设计，“我想讲一样嘢，我唔系懒惰所以唔写结局，其实小美（陈晓华饰）死已经系一个结局，钟家宝（陈滢饰）已经众叛亲离，最后𠮶个其实系一个伏线，其实好多剧都有open ending，《大时代》周慧敏最后有冇死呢？但今次《美丽战场》嘅结局，有悬疑性、趣味性系我想有嘅，而《美丽战场》由首播到大结局，我都系希望一直咁有争议性，一定有人话我烂尾，但我一定唔觉烂尾，所有嘢都有铺排，平心而论，今晚大结局真系剧力万钧，一集咁多嘢发生，林小美死𠮶场，我相信好多人都感动，我知网民嘅反应，但所有嘢都系我一早计算好哂，唔系点会咁有争议性呢？但我唔系一部神经错乱嘅剧集，我只系有啲地方留白。”