季前赛．专访︱葛绰瑶爆与姜涛有亲密戏：我做紧演员要做嘅嘢啫！

ViuTV原创剧《季前赛》除了有MIRROR四大男神姜涛、Ian（陈卓贤）、Edan（吕爵安）和Stanley（邱士缙）担纲演出，亦有ERROR人气王193（郭嘉骏）和肥仔（梁业），以及好戏之人张继聪助阵，一众热血男儿更在篮球场上挥洒汗水，刚阳味满到泻！演员阵容只得仔？非也，主角们的“痴汉篮球队”除了一班人气靓仔，还有万绿丛中一点红的葛绰瑶（Yoyo）。Yoyo在戏中饰演会计系四年级大学生兼篮球队军医“河马”何玛莉，喜欢姜涛饰演的“阿孝”高家孝，作为观众，当然最关心两人是否有亲密戏份，Yoyo接受《香港01》专访时便指他们只有“BB级”的亲密场面：“大家都唔使担心！（惊唔惊姜糖嬲？）如果要嬲一个同场都可以嬲啦，要睇大家点样睇件事，同埋都系角色、剧情需要，我都系做紧演员要做嘅嘢啫！”

时日太快，转眼间已经离Yoyo首次亮相《全民造星IV》有足足一年时间，笑指已经还是“超级新”的她便指一切还像昨日发生：“好多嘢都要时间适应，特别系啱啱开始拍剧嘅时候，长期处于好紧张嘅状态，好记得导演（袁剑伟）提番我做番平时自己就OK。（之后拍《那年盛夏 我们绽放如花》得心应手好多？）都唔系，都系好紧张，因为两个角色好唔同，所以我仲系尝试状态里面。（会唔会紧张到口窒窒？）我反而系不论系做主持定演戏，都会讲得好急，因为实在太紧张，之后先知道要慢慢嚟，人哋先知你讲紧乜。”在《季前赛》中，Yoyo与MIRROR、ERROR有大量对手戏，可有向一班师兄偷师？她坦言在Stanley身上学习了不少：“佢每套剧都准备得好充足，佢个优点系每一套剧你都会记得佢个角色名，而唔系只系见到Stanley，作为一个演员系好值得学习，观众会赞‘好钟意睇你边边个角色’，好想可以做到咁。”

点击下图观看Yoyo专访靓相：

Yoyo在《全民造星IV》总决赛中排第16位，成绩肯定不算最好，而她最后亦无缘加入女团COLLAR，她在访问中剖白当时心情：“收到个Message话我冇份入团时，坦白讲，心情系有少少失望嘅，虽然之前一直都觉得自己处于淘汰边缘，但毕竟都走到最后，所以……不过一切都系好似首歌咁，‘相信一切是最好的安排’，顺其自然，而家我都揾到一条觉得好舒服、好钟意嘅路。”由参赛到现在，都有不少声音指Yoyo“得个壳”、“花瓶”，问她会否介意时，她说：“我多谢佢哋咁样讲，但系我觉得自己又未靓到‘花瓶’咁，我有时照镜仲会觉得自己好丑样呀！”

而除了“花瓶”之外，“魔音”亦是对于Yoyo的另一大批评，她坦言自己确实唱歌时表现时好时坏：“某啲表演我都觉得自己几‘魔音’，但唔系每个表演都系超级‘魔音’，我觉得呢样嘢可以透过练习改变！（畀人笑伤唔伤心？）我觉得同我心理状态有关，太紧张喇，好容易就会各方面都做得唔好，所以之后我都有个成长，就系做每件事都唔可以紧张，可能我练得好多次，次次都唱得好，但就系咁最后唱得唔好，如果有机会，我都想话畀大家听，其实我都OK嘅。”

化妆：Choco Wu @chocowu_makeup
发型：Terrence Chan @terrence_chann
服装：@majeparis