蔡枫华开演唱会劲多嘢讲　串黄子华唔识做戏：佢封神，我都系咁讲

蔡枫华一连两场嘅《深情永记演唱会》今晚（21日）喺荃湾大会堂开锣。以黑Cap 、黑超配皮褛出场嘅蔡枫华一现身，全场观众尖掌声不绝，又有人举灯牌。

蔡枫华表示今次开骚两场全爆满，理应冇压力，但由于已四年多没有唱歌，所以好惊。“今晚好感触，本身打算加场，但度极都无场，只可以开下午三点，作为歌手、自资者，都觉得系对观众唔住，宁愿唔加，将来揾个大啲嘅地方再开，红馆，伊馆都冇所谓。”蔡枫华指自己入行后第一只碟只卖五千张，成绩强差人意，幸好笫二只碟成功逆转，但他当时亦有谂到底要留在娱乐圈多久。

“因为我未丢低书包已走入娱乐圈，所以我系真真正正嘅娱乐圈人。我畀个意见大家，有啲咩KOL成日话有秘闻，我真系谂唔通点解咁多人去听，佢到底知道几多嘢，我话畀你听，好多时娱乐圈嘅嘢，就算娱乐圈人讲畀你听，你都唔好信啦！”

蔡枫华又感谢有报道指他演唱会开卖第一日滞销，间接帮他做宣传。他又感谢观众山长水远到荃湾支持他。“成日都谂系咪几年之后出番唱，会唔会又多啲人嚟睇？而家卖得嘅准则，系要喺半小时到一小时内爆。蔡枫华啲骚从来冇赞助、又唔派飞，因为冇discount ，乜都冇，系逐张卖出去，非常辛苦。红馆开几廿埋𠮶啲，全部都系大公司做，又有保险公司包，所以开几十场就系咁解，而你哋系真真正正正嚟听蔡枫华唱歌。”

蔡枫华又提自己80年代未有买楼，原因系将所有钱存入银行赚利息，并指所得到嘅比无线份粮更多，但亦同时错过很多“上车”机会，“如果你无楼嘅，唔使惊，蔡枫华陪你。”趁乐手准备期间 ，蔡枫华不停谈笑风生，又突然指黄子华唔识做戏。“我真心，就算佢喺度都咁讲。佢封神，我都系咁讲，我发觉佢同徐子珊就算情情塔塔，只手都系咁（做出机械人般的动作），因为佢做惯栋笃笑、你冇理由对住个女仔话爱佢，然后咁，但啲人又钟意听佢讲嘢。”