黄凯芹当年视周慧敏得个样　重提与公司闹不和事件：身段放唔低

黄凯芹日前作客TVB娱乐新闻台节目《StarTalk》，接受主播许文轩（Edmond）专访，大谈将于红馆举行35周年演唱会感受，黄凯芹称：“唔知系咪男人去到某一个年纪就唔顾身世，不修边幅，我平时唔可以话系烂挞挞，但会系一个好随意嘅人，所以有歌迷话我点解你成日咁样，以前都唔系咁。（平时有冇不断Keep Fit？）我冇特别Keep，可能生活习惯影响，饮食方面自己唔会食啲肥腻嘢，又唔食宵夜，有适量运动，好钟意游水，因为游水带氧运动有帮助，可以塑型。”

谈到35年来的圈中朋友，黄凯芹直言跟周慧敏合作多年，拥有强烈CP感，他说：“我哋因为电台而认识，我仲早佢几个月入电台，好开心听众好受落，变咗电台嘅最佳拍档，引伸到舞台上音乐上都系最佳拍档，CP感好重，我哋合唱嘅歌，如果揾另外一啲人唱好似唔得咁。（周慧敏讲过你哋沟通系用Email？） 其实想当年系佢教我个电话，佢仲揾咗啲朋友帮我买同Set Up电脑，跟住就用Email联络，自此我哋就Keep住用Email就够！好似上次佢开周年演唱会，佢都系用Email揾我，不过我成日唔Check，差啲Miss咗！仲俾佢问返我点解咁耐都唔覆！我结果冇问题呀！我做到嘉宾！”

他亦有重提与公司闹不和事件，当时黄凯芹凭《晚秋》一曲在内地爆红，但3年后与经理人公司关系决裂，更黯然告别乐坛：“当时经理人想我出只碟，全部用晒内地嘅去改编，其实当时去一间新公司就系想做原创嘅创作歌手，同我自己嘅理想背道而驰，之后反咗面，停晒我所有嘅收入同所有演出机会。生活点算呢？自己𠮶个身段放唔低，所以一走了之，去咗外国生活。”

黄凯芹直言易满足，他说：“其实35年已经赚咗，我要做嘅嘢已经做过，我拍过剧、做个主持、出过好多唱片、演唱会，我仲搞过舞台剧，如果35年之后，可以揾一个拍档做一个双人演唱会就好！可能会系一个新冲击都未定。（咁使唔使Email定周慧敏？）如果佢唔OK咪好瘀？等主办同制作公司安排啦！”