专访︱STRAYZ闯乐坛自掏腰包不靠大水喉　CK：做音乐要唔怕蚀底

ViuTV选秀真人骚《全民造星IV》排名结果早在上年圣诞夜尘埃落定，包括三甲在内的八位参赛者亦组成了女团COLLAR，而其余未入选的则顿变成“遗珠”。不过，节目完结不代表追梦旅途宣告结束，廿强参赛者之一的VAL（赵展彤）、CK（黄斯琪）、榛綦（Nat、何榛綦）、Ariel（曾家莹）和玮翘（林玮翘）4月中便组成女团STRAYZ，而日前她们更公开出道作《Stray》，对世界宣告五女已经重新站起来向梦想进发。

由成军到正式推出单曲，五女花了三个月的时间，玮翘坦言是比原本计划迟一个月：“开头系好快手，系后尾发现到好多幕后、联络上嘅嘢原来好困难，所以导致Delay咗亦都打击到我哋士气，但到只歌终于上架，我哋又变番好感动，我仲好记得当时我哋系开紧会，当见到首歌喺唔同平台上架，我哋系嗌咗出嚟。”

CK补充时便透露单是MV剪接、调色都花了两个月时间：“呢首出道歌动用咗我哋身边好多朋友，去支持我哋去做呢件事，都好多谢佢哋肯向我哋伸出援手，无论系落手帮、从旁指导嘅人都真系好多，我哋真系意识到好多人系好爱我哋。”她们参加《造星IV》时已经接触幕后创作，问今时出歌是否考不起五女？玮翘坦言今次难度比之前参加《造星IV》更大：“呢个作品系好好嘅一课，畀我哋知道幕后嘅嘢，虽然《造星IV》已有接触到幕后工作，但真正做，难度更大。”

自组女团，使费庞大，CK坦言没有刻意计算现时总共用了几多钱：“其实我冇特登去计总共用咗几多，我哋个做法系一要用钱就会夹份，我谂而家每个人都已经畀咗五位数出嚟！（比想像中用更多钱？）我觉得OK，因为各方面我哋都悭到尽，主要系Book场、宣传比较用多钱。”STRAYZ多数成员已经投身社会，所以要拎钱出来也不算难事，玮翘一直任职舞蹈老师，榛綦接广告维持收入，CK、VAL靠做音乐创作揾食，但Ariel仍然是学生妹一名，真的负担得起？Ariel说：“虽然系五位数，但系暂时都OK，而家都有返Part-time，冲多几杯奶茶啰！”

点击下图观看五女专访靓相：

提到外界一度怀疑STRAYZ背后有水喉射住，五女即时齐声说：“我哋都想呀！”而CK补充时便指她们没有一个与任何一间公司签约：“我哋短期内都唔会考虑签公司，我哋都几满意、几习惯呢个模式。虽然作品上、呈现上有改善嘅地方，但系咁样都可以畀到大家睇到我哋有成长、进步嘅空间。”她更笑说：“如果真系有幕后大佬，𠮶个只可能系我，因为我啲嘢高质！哈哈！咁当然其余四位成员都畀咗好多好好嘅谂法畀团队，所以先成就到件事。（有冇谂几多收支平衡？）呢个阶段仲未谂点样获得营利，作为一个想做音乐、想做艺术嘅人，一定要唔怕蚀底。（咁样可以运作到几耐？）可以玩好耐，因为冇人限制我哋，只有一日有人想听我哋嘅作品，我哋都会继续做，就算冇钱我哋音乐都可以照做，舞都可以照跳。”

STRAYZ与COLLAR和Lolly Talk一样由《造星IV》参赛者组成，又是同年出道，外界难免会有比较。对此，榛綦坦言要放下心中把尺：“其实唔需要比较，大家要一齐努力，一齐进步，因为大家都有唔同嘅特色，我哋最大嘅特色就原创性，大家有唔同个性先好睇，香港乐坛都需要唔同嘅新面孔，有唔同幼苗茁壮成长先至好睇。”又指STRAZY与两团非常友好。至于谈到她们将于31日到旺角麦花臣场馆举行的“花漾女生音乐祭”演出，CK便指除了《Stray》之外，她们会再次呈现参加《造星IV》时的原创项目，叫观众落足眼力欣赏。

Hair & Makeup：Cindy Lai, Sandy Cheng, Shelia Ko@hongkongmakeupartist
Wadrobe：PortsPure, iBLUES
Venue：Rollalar