通灵之王｜儿子庞景峰靠功夫通灵　钱小豪感错愕：佢通灵咁犀利？

钱小豪今日（25/7）现身浅水湾出席电影发布会。提到儿子庞景峰早前亮相《通灵之王》节目透过功夫感应灵界。钱小豪听到即时感到错愕：“吓！佢有通灵呀？咁犀利⋯⋯咁都唔出奇呀，老豆都识捉僵尸，佢识通灵又有咩问题啫。（有冇过两招演戏心得俾佢？）咁梗系有。其实我同佢都合作咗成7部电影咁多，而我好希望佢能够独立成长，佢成长咗我唔使咁辛苦。（佢未够炉火纯青?)你讲得啱，佢未去到人哋一睇就觉得佢系一个演员。”

被问现时庞景峰的表现相比起你后生时逊色？钱小豪直言：“就系因为呢样嘢我就更加要提点佢，因为佢系我个仔，所以会有好多人会将我同佢比较嘅，而佢都听过有人同佢讲，话佢冇老豆咁Fit，佢系有呢啲经历。（咁你觉得系唔系？）咁冇办法啦，因为我经验多过佢嘛。咁所以我系好希望佢快啲成长，我就冇咁辛苦。（你好辛苦？）辛苦㗎，如果你有个仔每样嘢都会紧张啲。（佢听唔听教？）佢听教嘅。）（学嘢有冇你咁快？）学嘢就唔同嘅，我哋好细过嘅时候已经锻炼，相比佢系喺舒适圈成长，变咗或多或少都有啲倚赖咗，咁希望佢可以独立。”