I SWIM专访︱Edan最初无缘参演 Stanley教着两条泳裤打底
青春、热血，以游水为题材的剧集，加上偶像的参演以及男演员们的“肌肉放题”，ViuTV新剧《I SWIM》仿佛包含了所有成功的元素。难怪剧集播出前，已经引来网民高度关注。不单只观众期待，在剧中饰演李马荣的吕爵安（Edan）亦对剧集非常有信心，更期望可以超愈《大叔的爱》的成绩。三位MIRROR成员Edan、邱士缙（Stanley）和王智德（Alton）日前接受访问时重提拍摄难忘事，Alton经历真正的冻到抽筋、Edan上水后眼前一黑突然晕倒，回想起练水、操肌、冬天拍落水戏的日子，他们直言辛苦却无悔，亦很庆幸能够成为剧中一员。
撰文、采访：陈芷颖
摄影、短片：叶志明
剪接：陈芷颖
重提试镜难忘事 Edan最初以为无缘参演《I SWIM》
回想起试镜难忘事，在剧中饰演“男飞鱼”王亚乐的Stanley坦言从来没有想过被选中，后来却从导演口中得知自己是第一位被挑选的演员：“一嚟要做学生，我又有一个好大嘅纹身，纯粹抱住一个想认识导演嘅心态去Casting。但导演近期喺访问竟然话，佢系第一个拣我，因为佢觉得我Casting郁到啲嘢…对一个演员嚟讲，郁到啲嘢好紧要，听到呢个Comment好开心，得到角色之后就搏命去练习。”
饰演Stanley劲敌李马荣的Edan坦言最初跟Stanley想法一样，同样认为不会被导演选中：“我觉得自己唔适合拍《I SWIM》一嚟系我冇身材、冇肌肉，不嬲都唔系除衫派，二嚟系本身唔钟意游水，亦都几惊水上活动。但都觉得Casting梗系要去，系一个经验。𠮶时Cast李马荣、余浪冲同大秋好似都有。Cast完系冇回音，后尾得知番导演觉得第一次Casting系搞唔掂。”
正当以为无缘参演《I SWIM》，过了三至四个月，Edan却收到第二次试镜通知：“副导演话虽然第一次Casting做得唔好，但佢睇到Edan有机会做到李马荣，恶起上嚟都恶到，所以就有咗第二次Casting，之后就决定李马荣揾我做。收到消息都谂咗阵，有同花姐倾。花姐担心我啱唔啱做呢个角色，个角色同我本人、同大家对我嘅印象好唔似，佢系好认真、零搞笑嘅角色，担心我做得唔好，就话唔啱就唔好做。我觉得唔可以惊做得唔好就唔做，虽然好短时间又要练水、又要操肌，但都系一个机会，机会嚟到就要捉实，所以决定要试。”
他十分庆幸有份参与《I SWIM》，导演的一句“冇谂过最尾你系最接近李马荣”令Edan相当满足。Alton则以轻松状态去试镜，最深刻是“激嬲”制作组人员：“（试镜时）其中一幕要闹人，用剧本去对戏，后尾佢（制作组人员）话我有闹到佢嬲嬲哋，佢话呢个可能系我入选原因。”
Edan、Stanley着两条泳裤打底 Alton竟然唔知情
在剧中饰演中学生，三子要重新着起校服，毕业多年的Stanley坦承有少许尴尬：“好彩得两场要着校服，起码着运动服同埋泳裤都仲呃到少少人。都知自己未必好似（中学生），但尽量喺身形调节，贴近啲个角色。”Alton笑言着校服没有感到尴尬，反而扣起第一次试身着泳裤时的回忆：“我同Stanley Fitting时第一条泳裤唔系呢个款嚟，仲要唔系黑色（Stanley：三角形，红卜卜），我系‘青BB’。”
Stanley说害怕观众太留意自己的“三角形”，便向导演建议换较长的泳裤。他亦传授打底方法给Edan，Edan说：“我同Stanley着两条泳裤。”Alton听后十分惊讶问：“吓？原来系㗎？”Edan续指：“老实讲有啲时候有少少尴尬，唯一避免尴尬情况出现，就系做啲保护措施。”Alton语带唏嘘指有一幕颇为尴尬：“幻想下，几个男仔临出场前好热血‘123，去’，但个镜头喺下面。”全场立即大笑，Stanley笑言：“可能对只手呢。”
经常半裸上身以泳裤上阵，一众男演员均为角色练出爆肌身形，Edan表示受同辈压力影响不敢怠慢，不断自我鞭策成功练出“25年来最光辉时刻”：“见到Stanley同Alton副Body就觉得真系要努力啲先得，见到大家食得好清就会有团火咁做。带啲鸡蛋同番薯，开头坚守得好啲，去到后尾真系落水好冻，开始次次都食唔晒啲鸡蛋，次次都系带嚟畀佢哋食，自己就食肥嘢，去到后面就放弃咗。”
冬天拍落水戏 Alton冻到抽筋Edan突然晕低
夏天着羽绒拍摄，冬天拍落水戏好像是每位演员必然的经历，三子亦不例外，回想起十一月拍落水戏，他们先“哗”一声再描述当中感受。Stanley说每次落水前都要大叫兼“死都唔肯落水”：“例如8个人喺度，死都要睇下边个落先，落到去要等Roll机，所以死都唔落住。我会形容个感觉系你每郁一下，都好似被针吉咁冻到，热咗身之后会好啲，同埋落到去要系咁郁，唔好停就会好少少。”Edan绘影绘声形容个人会不断震：“由朝早8点拍到夜晚6点，中午有阳光OK，一去到临近4点就开始好冻，水底大头Shot就经常6点拍，系最冻嘅时候。虽然好冻，但见到大家大叫跳落去，震住上番嚟，过程热血又好温暖。导演、Cam Man都长期喺水，所以好Respect佢哋。”
Alton则分享自称为“黄金时刻”的故事，就是第一天拍落水戏的恐怖经历：“第一日落水系香港突然变到好冻嘅一日，剧本上我个角色同场口系要快，咁我咪快，快完之后都几攰。导演话返转头嚟多次，我心谂‘大获，啲能量用晒’，冲咗次忘记咗拍紧嘢，后尾第二、第三Take我就好辛苦。跟住就抽筋、嘴唇发紫、头晕，应有尽有，最恐怖系腹肌抽筋，睇住佢成排去咗右边，好恐怖，我好惊又讲唔到，就自己喺池边卷埋。”Edan续指：“未见过Alton咁，但唞咗一排又好番啲。我哋有一句金句，‘唔落水嘅就病，落水嘅反而唔病’，全部落水嘅演员反而冇试过冷亲。”
虽然没有生病，不过Edan却试过在片场突然晕倒：“Cast中李马荣之后大家去练水，第一次就畀大家睇下我都游到下，唔好咁核突。一游完上水做热身，我晕咗，25年嚟第一次晕，可能太耐冇做运动又冇热身，几瘀呀。突然眼前一黑，佢（Stanley）即刻扶住我，跟住搬我入去坐就好番啲。”
Stanley拍剧后讨厌游水 Edan对剧集成绩有信心
拍剧期间不断加操练水，Edan和Stanley的游泳技术大大提升，虽然有成功感，但两位坦言没有因此爱上游水。Stanley甚至讨厌，更质疑人类为什么要游水：“一路游就谂我又唔系鱼，喺水又唞唔到气，点解咁辛苦又要闭晒气系咁游呢？”
剧集出街前已得到网民高度关注，Edan说没有压力之余亦对剧集成绩非常有信心：“因为团队好用心、好犀利，剧本亦都好好。加上偷睇咗几集，觉得都真系几好睇，相信大家都会钟意。（有可能超越《大叔的爱》成绩？）要超越啦，要一套比一套超越，希望大家钟意。”
演唱会彩排如火如荼 姜涛美国之旅后状态大好
MIRROR红馆演唱会将于本月尾举行，他们透露排练正进行得如火如荼，但Stanley自觉不太理想：“对自己要求高，四面台觉得要再好啲、再好啲，永远负面啲去觉得唔够去追，你问我，我会觉得唔理想，可以再好啲。”Edan认为最缺乏的是时间：“12个人真系齐人系上星期嘅事，呢排Focus搞掂团嘅嘢，其他时间就各自修行。（时间紧迫紧唔紧张？）每一位Artist做演唱会都会紧张，唯有将紧张变成一团火，每一次踩台都会好热血，啲火会爆晒出嚟，所以都有信心。”演唱会后，MIRROR便会专心准备日本Summer Sonic的演出。
讲起出国，姜涛早前的美国之行寓工作于娱乐，三位成员亦戥对方开心，Edan说是一个很好的减压和放松机会：“佢去完个Trip返嚟都开心咗。”Stanley指姜涛现时的状态完全不同：“呢个Timing出去系好，对演唱会Idea多咗好多Inspiration。虽然加埋隔离佢前排先出嚟，但出番嚟个状态好好仲好，如果佢Keep住做嘢状态唔好，可能令件事更加慢。去咗两日旅行，返嚟开心晒。”
点撃睇更多专访照片：
Makeup：Giann Cheung @Annie G. Chan Makeup Centre
Cori Wong @Annie G. Chan Makeup Centre
Hair：Man Chan@ CHIC Private I salon
Jeff Wan@CHIC Private I salon
Wardrobes：Tom Ford, Sacai, Burberry, Polo Ralph Lauren, Burnello Cucinelli, Giuseppe Zanotti, Bulgari, Messika
Styling：PIPA Creative