隔离童话集专访︱梁祖尧确诊启发灵感 陈凯咏受邀即刻“𦧲饭应”
隔离、围封、强检，这些字眼近年来每日都缠绕着香港人。活在疫情的阴霾下，不单只生活模式彻底被改变，担忧、无奈等等的负面情绪亦随之而来。梁祖尧于今年二月确诊，当时的他正为风车草剧团写剧本，原定的都市爱情故事亦因为“中招”，而变成你与我或许都感同身受的隔离故事《隔离童话集 Bye-Bye Your Tale》。剧团主脑梁祖尧、邵美君及汤骏业（Ahdee），连同赵学而和舞台剧初哥陈凯咏（Jace）接受《香港01》专访时详谈“隔离”感受，故事以“童话”包装，到底他们是否相信童话？
阿祖确诊改变故事方向 Ahdee欣赏Jace温暖性格
梁祖尧在今年二月中开始构思剧本，原定写一个以女性观众为目标，轻松的爱情轻喜剧，却因阿祖确诊而彻底改变故事方向。“二月中我中招喺屋企，放心系轻症，基本上完全冇病征，𠮶时冇讲系废事拎嚟做新闻，唔想俾人觉得我消费𠮶样嘢…中招时谂爱情轻喜剧，真系冇feel，一个人困喺间房度，爱乜嘢情，点样轻喜剧呢？睇咗无限韩剧，一日睇一个season，就不如写隔离，跟住好快就出咗三个人物，就系我、阿君同Ahdee。”阿祖被韩剧《少年法庭》中的沈法官吸引，决定要写一个刚强、是非黑白分明的人物，他很快选定角色人选，就是赵学而。
《隔离童话集 Bye-Bye Your Tale》讲述阿祖、阿君同Ahdee一醒来就入了隔离营，不知道如何进来，也不知道为何要进来，而Jace就是接待他们的工作人员。阿祖坦言当初不知道Jace的角色应该找谁人饰演，最终导演Ahdee决定找跳唱歌手Jace。“喺电视嘅卖货节目同佢合作过，几个月时间，我发现佢除咗表演叻之外，转数好快、超级勤力同埋佢对事物好sensitive…听佢讲嘢好贴心，工作之外大家倾偈，你会好易俾佢融化，好容易掂到佢个人，有啲人讲两句好客套就会拜拜。佢好温暖，望落好似好倔强，入面充满住对人嘅好奇，呢啲特质嘅女演员好少见。”
舞台剧初哥Jace收到邀请即刻“𦧲饭应”
听到Ahdee的称赞，Jace谦虚微笑，小时候一直渴望演舞台剧的她笑言收到邀请时立即“𦧲饭应”。“一直好想试acting，舞台剧比起拍电视电影，我觉得会真实好多，所有嘢real time又冇得剪，系好大嘅challenge，所以好想试。有人想揾我做舞台剧？我又冇受过专业训练，梗系‘𦧲饭应’。”
首次参演的舞台剧讲述隔离，而Jace又刚巧有首歌叫《隔离》，可说是在无奈之中找到一点乐趣。“我首歌都系因为呢件事，都冇谂过呢件事咁耐，以为好快就完，咁啱连到首歌我都觉得好有趣。疫症令大家有好多灵感、冲击，好多新嘢想发掘，呢个系几好嘅记录，做呢首歌都系想记录呢个时代发生嘅事情，呢套剧相信都会系。”
第五波疫情众人感受至深 阿祖：You are not alone变成You are alone
第五波疫情令大家手足无措，面对确诊数字不断上升、突然的围封强检，众人感受至深。留家抗疫的这一段时间令Ahdee真正停下来反思现况，“第一次面对（疫情）嘅时候系全世界同你一齐面对，仲可以有种乐天心态。（阿祖：由You are not alone变成You are alone）系呀，You are alone要点对应？真系要自我调节，有啲从来冇谂过经历嘅事，原来会真真正正发生…被迫喺屋企就真真正正问自己，如果郁得返会做啲咩，先知道人生真系要啲咩。虽然喺谷底、坏坏哋心情之下，反而又见到自己真正系点。”平日总是开朗乐天的Jace亦在这段时间学懂面对负面情绪，“当世界好多唔开心事情发生，你唔会仲夹硬呃自己冇事、好开心，望住啲负面情绪，慢慢又觉得唔系咁可怕。几感恩认识多咗自己，静落嚟认识自己原来唔系咁坚强，唔系咁有信心、咁有信念嘅时候，有反思，有感受，唔多唔少都有成长。”
对曾经患有情绪病的学而来说，疫情对心态上的影响反而不大，“之前情绪病重新structure过自己思维同面对人生嘅态度，所以对我嚟讲唔系好艰难嘅时候。要讲艰难其实做人每一日都艰难，只不过心态点面对，如果你要苦瓜干咁系冇人救到你，点装备自己系最紧要。”阿祖表示今次舞台剧的剧本就是这段时间的感受，“当自己一个人时，好多啱同错、赢同输摆低晒，先发现呢啲嘢之前搞到自己几咁唔开心，好无谓…突然喺𠮶段时间醒咗，想讲嘅嘢都喺呢个剧本，听落件事好老正，但佢系喜剧。但往往一个喜剧要好笑，就系要有呢啲反思，过咗呢啲反思先至好笑。”
上一次说再见后 有些人可能从此不见
疫情来袭可以瞬间打乱你与家人，朋友的见面和约会，对上一次说再见后，有一些人真的很久没有再见面吗？Ahdee托头轻叹说，“呢排好多朋友走，你头先讲好耐冇见，但我有啲系冇得再见。好耐冇见𠮶啲可能系social media都会联系、约出嚟，但有啲联谊系联谊埋𠮶次后，应该会好耐都冇得见，因为佢移民…过程系佢同我嘅人生步伐唔系再一齐，呢个令我好有感觉但我解决唔到，只能慢慢消化，要接受有啲好重要嘅朋友，人生有一段长时间未必可以同佢哋再成日见到，好唔舍得。”学而则以另一角度安慰Ahdee，“For their own good，去新嘅地方，有新嘅生活，可以唔使喺香港，个个都话好鬼压迫嘅感觉，我会替佢开心。”
面对离别，阿君说最重要是以什么心态面对，“喺香港未必成日见，反而因为你去咗好远地方，我成日挂住你，会成日想揾你。好似我同阿妹咁，佢喺英国，但我同佢最friend，有咩事都会直接揾佢，呢种隔离、分离有唔好，但都会trigger到你想行近啲。”
不相信童话但有存在意义 Ahdee“我哋系需要发梦”
《隔离童话集 Bye-Bye Your Tale》顾名思义是以“童话”来包装，五位演员相信童话吗？阿祖不假思索秒速回应，“一啲都唔信，童话真系用嚟呃人，但我哋可以制造童话式嘅happy ending，要唔要happy ending系喺我哋手入面，但好多时我哋选择唔要。”学而同意并补充说，“好多人希望有happy ending，其实个世界边有咁好？只系一个好强大嘅渴望，但你要唔要面对现实呢？因为现实永远都系残酷，所以人先会希望有个好圆满嘅结局。完美结局，边会有㗎？睇你自己点衡量，我觉得有10蚊好完美，佢觉得有100蚊先完美，每个人都有自己把尺。”
乐天的Jace同样不相信童话，但在残酷的现实中，童话却为大家提供喘息空间，“我唔信但我都想自己有阵时可以信，想多啲人可以信。因为现实大家都够清楚、够残酷，都想有啲唞气空间，如果可以做到一个场景、时刻令大家可以呃到自己半秒，去信有童话，咁都几有意义。”阿君则非常羡慕真心相信童话的人，“身边会有啲人由中学识到而家，又好开心，见到呢啲童话，好appreciate佢哋会相信。但我觉得童话系可以cheer up人，想追𠮶个完美但未必追到，但去到中间都已经好叻仔，童话有存在嘅意义，但未必系100%可以追到。”自小已觉得童话骗人甚至看到想讲粗口的Ahdee，始终认为世界是需要童话，“我哋系需要发梦，个梦系令我哋喺残忍嘅世界继续行落去，我未必信，但我需要个力量。”
点撃睇更多专访照片：
Wardrobe：
梁祖尧: Brunello Cucinelli, COS, Mr P. @MR PORTER
邵美君：COS
陈凯咏: Rickyy Wong Studio
赵学而: ARTO.
汤骏业: Brunello Cucinelli, HOMME PLISSÉ ISSEY MIYAKE
Makeup：Deep Choi @ deepmakeup & Shirley Mak
Hair：Jo Lam, Jaden R & Kenki @ Salon Trinity
Venue credit ： Finest Design Nest