三高女生冇嫁期？心颖劝姊妹慢慢拣　朱千雪：沟通紧要过层楼　　

学历高、颜值高、人工高的“三高”女生，斋睇条件都知道是天之骄女，但竟然一样遇到难揾对象的烦恼？究竟是男仔不敢高攀，见到“三高”女生就已经“缩沙”，还是女生集体揾笋盘，可是被称为笋盘的男士不少已被人私有化，或是享受拍散拖的单身生活，笋盘变得可遇不可求。被誉为“智慧与美貌”并重的港姐，不少是“三高”女生的必然代表，其中两位港姐朱千雪及黄心颖，谈到本地叻女的苦况，异口同声叫姊妹们不要降低要求，终有一日等到Mr. Right。

2012年港姐季军朱千雪，被誉为“民选冠军”，她在加拿大西门菲莎大学毕业，在拍过《On Call 36小时》及《EU超时任务》后，却于2015年下半年，毅然向无线请假一年，修读中大的企业传播社会科学系硕士学位，去年9月再修读城市大学法律博士学位，人靓聪明，再加上父亲送赠的两个合共2千万物业，赢在起跑线兼且是人生胜利组，但感情生活却跟不少“三高”女生一样暂时空白。

朱千雪接受《香港01》记者访问，对于“三高”女生揾对象难，她表示：“大部分女仔都想揾个对佢好，夹得嚟嘅人，我啲朋友分开嘅原因都系呢啲嘢，唔系因为冇钱或者冇学历啰。”有说是港女要求高，令男生却步，更陷于“妳拣人、人拣妳”的困境。她提醒女生不要为此降低要求，“每个人都应该有自己要求嘅，反而要搞清楚自己想要乜嘢。其实女仔最想个男仔陪下佢、氹下佢，但好多男仔觉得自己冇学历，高攀唔起。”

她表示：“楼同车都系啲物质嘅嘢，两个人生活，或者结咗婚，有个地方住就得，无论买又好，租又好，生活得开心紧要过住得几大。若果间屋好大，但两个人唔沟通，又唔一齐食饭，间屋3万呎都冇用。”朱千雪更称连学历也不是她的择偶考虑条件，“反而唔好同我太相似，同朋友又好，拍拖又好，都想讲啲其他嘢，唔好咁闷。等于演戏又揾演员拍拖，咁咪剩系讲戏啰，我要有其他话题，钟意多姿多采啲啰。”

现年28岁的朱千雪，迎接29+1的年纪，不怕遇不上好男人吗？“又唔惊嘅，总之遇得啱就会拍拖，顺其自然啰。情愿等一个啱嘅出现，好过搞错咗，返唔到转头㗎嘛。”

同是三高女生的黄心颖，她是2012年的港姐亚军，于英属哥伦比亚大学的金融与国际商业学士毕业，在修读硕士期间参选港姐，随即入行拍剧。黄心颖接受《香港01》访问，她认为学历不代表一切，“唔可以用嚟define一个人嘅。（男女沟通及价值观会否受学历影响？）一定有少少，但我又觉得唔系好大问题，学校学嘅嘢，应用喺生活上，唔系人人都得，好似我读finance，但我都唔系做紧𠮶样嘢，所以我觉得唔会沟通唔到。”

三高女生要揾对象，是否要接受现实，其至降低择偶要求？“对我嚟讲，唔会因为任何嘢而降低要求，而且学历对我嚟讲从来唔系一个要求，我会觉得冇乜所谓，好多其他因素可以将学历𠮶样嘢睇得轻啲，可能𠮶个人好有毅力，或者佢做其他嘢好叻，佢个人好好嘅，都可以补偿返佢学历唔高啰。其实揾到高学历同有钱嘅人唔难，但加埋有感觉呢就难过揾个有钱嘅人。”

早前无线节目《有楼万事足》，港女Seasun择偶条件是先有2000呎楼，令不少男士却步，但对于黄心颖来说，物业从来不是加分或是扣分的原因，“我一定会买自己嘅楼，自己嘅车。你问我介唔介意对方冇楼，我谂我唔会介意，惊佢介意啫。其实揾对象由钱方面去睇，我谂永远都唔会幸福，同𠮶个人相处唔系睇钱㗎嘛，可能系俾妳嘅感觉，系相处得到，如果你真系钟意𠮶个人，即使佢收入好低，我相信一定有办法令件事work。我相信到某一个位，会遇到啱嘅人，唔会话学历收入相当先系啱。”朱千雪及黄心颖看来毫不心急，相信缘分总会到来，姊妹们收到未？