冥冥之中．专访︱李天翔退出“奸人”行列 自爆污辱唐诗咏最难忘
李天翔在ViuTV剧集《冥冥之中》中饰演“志强”一角，剧中的他用尽方法令情人梁又仟（Crystal）避过“人口控制公司”追杀，更宁愿她另嫁他人，可惜道高一尺魔高一丈，女方还是被执行任务的刘心悠枪杀，怒不可遏的他便找公司话事人郭羡妮报复，用情至深。咦，角色如此“干净”？“御用强奸犯”今次不用“侵犯”其他女星？李天翔接受《香港01》专访时便边笑边说：“真系冇呀，今次强奸自己就有份，哈哈！”
李天翔，1995年年尾经无线（TVB）艺训班入行，由儿童组“认字特警”做到变戏剧组“御用强奸犯”，直至拍完《解决师》后，于2019年正式离巢，与TVB结束宾主关系。首拍ViuTV剧集，李天翔直言感觉截然不同：“起码呢度有得瞓觉先，TVB你都知道所有嘢都好赶，ViuTV呢边，我拍嘅时间一日里面就真系安排到足够嘅休息时间畀演员。如果唔够精神，就等于带个壳返工，更何况我哋做演员要用感情，真系要发挥到，冇精神真系几大件事。”
黑白照的李天翔更加有型：
谈到李天翔在《冥冥之中》角色不是反派，终于不用再履行“御用强奸犯”的职务，记者问为何之前经常接拍类似角色，他坦言是一个“商业决定”：“老细知个员工擅长啲咩，就会继续畀佢做，要再谂揾其他人做会好麻烦，因为拍剧系好赶急，唔似拍戏咁可以用一年时间准备。”他指起初的确会感到尴尬，但拍多几次便会变成“熟手技工”：“最紧要系同个对手沟通咗先，倾好晒，系咁做就只会系咁做，讲好咗会摸边度，拍就会摸番边度，有身体接触嘅戏系要好准确，唔可以加唔可以减。我觉得呢个系一个演员嘅操守嚟，同埋系畀对方一个信任。”
问到最深刻的强奸戏，李天翔答谓：“《金石良缘》啰，因为我喺𠮶套里面一次过搞三个女仔，钟嘉欣、姚子羚同埋朱慧敏。（都几Chur！）都系呀，一套剧里面要搞三个㖞，你要记住呢套剧唔系三级片嚟。”他又指《铁马寻桥》亦同样难忘：“同唐诗咏𠮶场，点解深刻，唔系啲咩动作深刻，系好辛苦呀！𠮶场系外景，讲我喺山度，我追佢，我又着住西装，又要追又要托又要盛，好辛苦，好辛苦，真系唔会唔记得。”记者笑指不少观众一直以为他“艳福无边”，他即说：“拍嘢背后有几辛苦观众唔知，睇就以为我好开心！”
在《冥冥之中》里面，李天翔是一个不折不招的深情男，现实中，他亦是一名爱妻号，他2017年与拍拖多年的圈外女友谭宝怡（Bobo）拉埋天窗，当时便有报道指她非常有米，“其实都系记者Check到我先知，我虽然系成日演好高骛远嘅角色，但系我同一个人一齐，我系唔会查咗佢家宅先。”因为太太银弹充足所以能够果断地离开TVB？他坦言抱有离巢这个想法已经有好几年：“离开系关太太事，但系唔关财政事，系佢睇到一样嘢系，如果我再过多几年至有走嘅决定，你年纪大，你出到嚟人哋未必用你，要试就早啲试。”
太太是李天翔的强力后盾，问有否常常做浪漫事冧对方，他笑指最浪漫已经是求婚：“当时大家系倾好咗结婚，佢都知我工作忙，所以冇要求过我要做啲有仪式感嘅嘢，𠮶时我咁啱拍紧《果栏中的江湖大嫂》，跟住啲通告时间又好迟先畀到你，可能系今日先畀听日通告你，但系我就系过唔到自己，我本身系打算8号求婚，定Book定场，叫定晒朋友嚟，等畀太太一个惊喜，而我系去到6号好夜先确定到我8号OK，卒之就好匆忙咁搞咗个求婚，10号就签字喇。”问与太太结婚多年的他会否考虑生B，他说：“暂时冇呢个想法，我唔敢讲听日都系咁谂，因为身边真系有朋友，十几年都话唔要，之后就话有咗，仲要唔系意外，系话想要，𠮶一刻开始我就唔敢肯定喇。”
发型：@Joe