熊黛林续任医美代言人　索爆身形全靠戒宵夜：肚饿睇人哋食嘢嘅片

熊黛林（Lynn）再度获邀担任医学美容中心perFACE代言人，早前于影楼拍摄了一系列宣传照，穿上多套以白色为主调的服装，大骚婀娜索爆身形，究竟Lynn如何保持完美身段？她笑说：“以前有大Job都会做Gym、减肥，因为呢轮太忙喇，妈咪又返咗南京同埋屋企又少咗个工人，两个女又好黐我，我所有嘢都钟意落手落脚做，所以好忙。我连减肥做Gym练下腹肌都唔得，可能平时凑B嘅时候已经锻炼咗，当做运动，做番运动个人会健康啲、舒服啲。”

原来Lynn也有一些瘦身小秘技，她笑说：“因为之前夜瞓，所以我有食宵夜嘅习惯，生完之后身体系有少少唔同嘅，例如以前夜晚食几多都唔会肥，生完之后，食得太饱会胃酸倒流，又会肥啲，真系唔同，所以真系要戒，唔食宵夜，当肚饿嘅时候唔好自己食，要睇人哋食，睇人哋食嘢嘅片，见到好开心就等于食咗，好过瘾！哈哈……”要内外兼顾，除了节食，心态上也重要，Lynn说：“如果成日谂啲唔开心嘅嘢，会好攰，夜晚又瞓唔着，瞓唔着皮肤会唔好，又有黑眼圈，对身体唔好，系恶性循环嚟嘅。其实个人谂开啲，会瞓得好啲，皮肤靓啲，精神又好啲，系唔同嘅。”

曾经尝试迷失的感觉，Lynn认为目前已找回真正的自己，她说：“之前因为BB细个，我都希望亲自照顾佢哋，所以唔会有咁多时间去做自己嘢，要困喺屋企，包括夜晚出去食饭都唔会，冇乜私人生活，现阶段囡囡开始返学，我开始有番自己私人空间，虽然返学只系得两、三小时，我会趁呢段时间去做下Facial、做下机、做运动，买下自己嘅嘢，修身扮靓靓，做番自己做女嘅嘢，我都已经好享受，甚至乎趁呢啲时间出去做嘢，好开心！唔做嘢好似同社会脱咗节，之前两、三年有少少冇自信，出番嚟工作，揾番啲自信！”

今年Lynn拍了多套电视剧，又接拍了多个广告，要家庭事业兼顾，老公也十分支持，她说：“自从我返内地工作，返到嚟我老公问我系咪真系开心？做家庭主妇个人真系唔系咁开心，因为惯咗工作，之前出去做嘢，囡囡都会喊住话好挂住我，话唔想我出去做嘢，佢哋而家懂事，我会教佢哋每个人都要工作，呢个系一个人喺社会嘅价值嚟嘅，唔可以叫人养你一世，要同佢哋讲道理，妈咪做紧好开心嘅工作。其实屋企点都系放喺第一位，自己尽量都想平衡，工作需要摆喺好前嘅，未遇到好大冲突，不过如果真系要太长时间离开屋企，就唔得。”