雪姨拍片讲网上求职骗案　留言最精彩：你存在已经系骗案

自从“盆菜风波”后，雪姨上月“复出”YouTube界，任凭网民围剿、食店出声明割席，但雪姨就好似开咗滤镜一样，完全睇唔到，继续努力拍片。

雪姨日前又有新片，今次系讲网上求职骗案，仲揾嚟受害人分享经过。成件事大致系受害人Shirley(化名）喺网上应征投资公司文书助理 ，时薪120元，点知到最后原来系借出自己银行户口去借贷，Shirley话骗徒每次都系透过WhatsApp Call同佢联络，而最终佢分别喺两间银行、四间财务公司贷款2百万，当中有40万已经转帐……

呢类骗案《东张西望》都报道过N咁多次，咁由雪姨出片又有咩特别呢？特别在佢同受害人都真系用把口去讲，完全冇提供过任何对话截图、借贷文件、转帐记录等等，唔少网民都质疑其可信性，亦有指受害者语调轻松，完全唔似被人呃钱。

而且网民留言亦完全唔俾面，甚至直斥“你存在已经系骗案”，亦有留言问“盘菜既短片变左系生发水既广告，请问算是网上骗案吗？”影片上载三日已经7百多个留言，但观看人次只得3万多，同雪姨过往嘅影片相比，可算系插水式。