毛舜筠绕道泰国计错日子惨中伏　终返港呻感觉似打仗：系咪沦陷喇

毛舜筠（毛姐）与老公区丁平在去年圣诞飞往加拿大，与两个女儿团聚，原定在今年1月初返港开拍新戏，但却因港府对美、加、英、法等国家实施“熔断机制”，结果一直滞留当地。后来毛姐决定绕道经泰国回港，但就因计错日子，打乱了她返港的计划，她更用“中伏”来形容今次的经历，并拍片同大家分享经验：“譬如我1号离开加拿大，2号开始就系第1日喇，喺曼谷，到15号就系整整第14日，16号我咪可以返香港啰。”但在16号毛姐到达机场时才发现上不到飞机，原来因为时差问题，她在1号离开加拿大时，香港是2号，所以她实际上要到17号才可以飞返香港。

毛姐得知未能登机后即改机票，再改香港入住隔离酒店的日子，幸好都一一落实。毛姐辗转之下终于顺利返港，但她亦感叹整个过程太艰辛：“我系话喺加拿大受尽香港政府熔断机制嘅折磨，我谂过往𠮶两个月，𠮶9个国家嘅香港居民都身同感受，都好明白我哋点样被折磨法，因为每次当特首一宣布我哋又唔返得香港喇，通常系我哋时间嘅半夜，咁就要即刻起身立即改机票同隔离酒店，你知香港嘅隔离酒店几抢手㗎啦，真系好担心改到机票都冇酒店。”

毛姐绕道经泰国返港，但她就抱怨回到香港后感觉似打仗：“由一个悠闲慢活嘅曼谷飞返香港，一踏入机场就好似打仗咁样嘅香港，剩系喺酒店检疫呢件事上面，你已经发觉两个地方嘅处理方式好唔同。喺曼谷佢哋都上到嚟房间同我做检疫，但佢哋上嚟之前先会打个电话畀我，然后上到嚟会揿一下钟仔，然后开门做检疫啦。但一返到嚟香港第二朝早瞓醒，你就会听到有人不断揿钟同埋拍门，之前又冇通知你㗎㖞，你咪即刻要换衫、戴口罩、揾身份证啦，咁都需要一分钟啩？喺呢一分钟里面，佢哋就不断喺度拍门揿钟，喺个门口度‘检疫呀！检疫呀！攞身份证呀！’，真系令到你个心情好紧张同好烦躁呀！”

港府在周三（9日）透过紧急警示系统向全港市民同时发出中英文版本的紧急警告，除了讯息提醒外，手机还发出长达10秒的震动和恐怖音效，令不少市民大感恐慌，毛姐亦直言收到时被吓亲：“连一个讯息都要用警报式通知我哋香港市民，你知唔知𠮶日一响，我吓到个心都跳埋，我即刻问我老公发生咩事，佢话系政府畀我哋嘅讯息，我话香港系咪沦陷喇？所以我哋必须要调节好自己嘅心情，每日多啲练习深呼吸，用正面啲、乐观啲嘅态度去面对不一样嘅香港。”

点击下图睇毛姐一家温馨合照：