940920．专访︱监制罗嘉骏爆幕后秘辛　《二月廿九》系真人真事？

ViuTV剧集《940920》绝对不易入口，时间线复杂，既是《二月廿九》前传又是续集，一边讲述余家聪（刘俊谦饰）成为“神圣几何学会”会长前，与儿时玩伴林楚凝（蔡思韵饰）的一段穿越奇幻之旅，一边呈现“Yeesa”张丽纱（吴海昕饰）进入第二时空后，与变成了小说家的余家聪碰面的故事，还要伏笔极多，少看一集便会跟不上剧情，只“听”电视又会错失重要细节，难怪监制暨导演罗嘉骏（Steve）在第二集中，借客串演出的张敬轩把口连环自抽：“好有悬念，之后呢”、“其实唔系好睇得明”、“一开头就94年，之后又跳去2014年，跟住又跳番2013年，啲读者跟唔跟到呀”、“你仲有好多伏笔㖞，你解唔解到呀，啲网上连载最憎就系呢啲烂尾故”。

940920︱张敬轩客串出场疯狂“自抽”　隔住个Mon直接同观众讲嘢

Steve日前接受《香港01》专访便直认《940920》设定比起《二月廿九》更加复杂，是有心挑战观众“底线”：“相信头几集观众都会Keep住‘即系点呀’，可能会睇到攰，会觉得好多资讯，去到第六集开始个脑更加会爆炸，但最后大部份人都会睇得明，可能仲有小部份人睇唔明，就好似我阿妈都睇唔明《二月廿九》咁，但《二月廿九》已经系一条时间线。”刻意挑战观众的同时，他亦挑战了自己的极限：“今次真系好辛苦，前、中、后期都好辛苦，当中度剧本一定系第一位！”2020年3月，《二月廿九》刚刚播完，Steve便马不停蹄开始召集编剧度桥，剧本一早在2021年4月完成，但因为新冠肺炎疫情关系，台湾封关，无法在台东取景，所以被迫只用了半年时间将剧本重头写过：“本身去一个好近海嘅地方，周围都好靓，Ceci（蔡思韵）个角色就系开民宿，刘俊谦就住佢间民宿入面。不过，都有嘢好咗，例如‘神圣几何学会’，本身台湾版系第六集先出现，今次变番香港就可以第一集出。”

点击下图观看《940920》精美剧照：

《二月廿九》有“神剧”美誉，虽然Steve觉得“神剧”这个称号泛滥，但仍然觉得前作叫好叫座，令他倍感压力：“不过我今次亦都完成到一个好重要嘅目标，就系喺Budget内拍得完套剧，咁先系话畀人听我系一个做到监制嘅人，但之前唔系咁，觉得点都要拍，拍到冇钱都要拍，好唔成熟。”他坦言《940920》如果按原定计划拍摄，会超支廿万，但一边揿计数机一边删减内容，令他可以在预算内完成拍摄：“好多嘢系妥协咗，好多想要嘅剧情都冇拍到。（前作反应好，预算唔系大咗？）都有，但今次都争啲爆Budget，主要系因为文本上多咗好多嘢要拍，所以好多集数系End Credit（片尾）要叠住剧集内容出。 ”

与“友台”无线（TVB）不同，ViuTV剧集多由外判电视台外的制作公司拍摄，属于体制内的Steve反而是少数，上年年初开始做“ViuTV员工”的他，坦言比起之前做“浪子”有安全感得多：“每个月有粮出㖞，仲有医疗保险，以前边度有！同我𠮶时拍完《二月廿九》系两个世界，当时要请晒台前幕后食一餐饭，仲好记得餐饭万几蚊，咁我碌卡啦，但系唔够钱找数，我个心系一直淌血，系要问人借钱还卡数。（《二月廿九》之后冇即时好景咗？）冇，撞正2020年开始有疫情，好多制作都停咗，其实大台（TVB）系有揾我，有倾过条件，但系我最后推咗，其实条件唔算好吸引，同ViuTV唔争得远。”

不少行内人常常自嘲“前世做错事，今世做电视”，Steve的入行至今经历亦有一种命运使然的感觉，就连《二月廿九》、《940920》的诞生，也好像命中注定般。中三已经决志长大后“拍嘢”的他，大学时就读浸会大学，主修电影及电视，毕业那年，撞正王维基大搞香港电视（HKTV）到大学请人，所以便应征做副导演：“做做下发觉我系做唔到，好辛苦，好唔钟意，做副导演系冇创作，每日就系落单话要咩衫，去到现场就俾人X，同埋我唔钟意个故仔，我发现系我自己唔钟意𠮶样嘢，我就投入唔到落去，我就知我自己只可以做自己钟意嘅嘢。”做过两年中文大学的助教后，他便与陈志发开制作公司，希望可以接Job时“嗌高啲价”，然后对方又介绍他帮ViuTV拍节目，拍完《夜曲13》再拍《比赛志》：“之后，Digital𠮶边就叫我哋帮手拍条宣传片，就系《前度》（《玛嘉烈与大卫系列 前度特别篇》），佢话几好，不如将佢变做两集半个钟嘅嘢，我拍完《二月廿九》先听番，呢个系鲁生（鲁庭晖）畀我嘅测试，Test下我识唔识拍剧，拍完之后，金生（金广诚）就叫我见下佢，问我有冇故仔。”

“但其实我手头冇故仔。”Steve立即找了黄智扬（《二月廿九》、《940920》编审，《教束》导演）度故事，他们想了一个又一个天马行空，要千万投资才拍的故事，后来变了情史分享大会：“我话我有个女朋友，2月29号出世，好耐之前佢同我讲过，2月28号同3月1号中间𠮶一秒，佢会拍一下手去庆祝自己生日，几得意！如果我哋拍套剧，每四年先出一集，系咪好过瘾，之后个谂法再癫啲，揾个女仔，由佢16岁开始拍一集，20岁再拍一集，24岁再拍一集，每四年拍一集，但之后冇左件事。”然后，隔了一年，Steve才找了一个编剧帮手把想法化成一套剧集：“再唔系四年一集，系个女仔每四年有咩改变，我就灵机一触，既然拍手咁有型，不如玩穿越时空，即系个天送番廿四小时畀佢，好似得㖞，好似好浪漫㖞成件事，一条好桥㖞。一开始系写台湾，同埋得Ryan同Yeesa，系度到中期先觉得唔够料写，加多个人，加余家聪。成件事系一步步，用足几年。（交功课一刻系点？）金生一收个故仔，就话得，拍啦！”

Steve用《二月廿九》、《940920》证明香港剧集仲有得搞，但不代表本地制作从此够料走出亚洲、冲出国际，身在其中的Steve认为一切还需要多方元素配合：“香港电视系有得搞，始终𠮶个入屋程度好高， 比起电影高好多，当然我最后嘅梦想系拍电影，但系而家呢刻电视真系好好，系Feel到呢两年娱乐圈好咗。不过，去唔去到韩剧嘅高度，我觉得未必得，佢哋成个行业对未来有信心，肯掉好多钱落去拍，蚀钱都冇所谓，又肯等十几年，香港好好经济嘅话都得嘅，但而家真系经济唔好。”前景局限，仲做落去？Steve苦笑：“我冇嘢识做，我净系识呢啲！”

940920︱从影以来最重戏！　余子明跳海自尽一幕堪称催泪弹放题