专访︱ERROR新歌邀谢安琪张继聪客串　Dee拖女神手心冒汗：热呀！

时隔七个月，“宇宙天团”ERROR终推出团歌《爱情值日生》。被193（郭嘉骏）称为“ERROR Comeback”之作就当然要玩大佢，新歌邀得何秉舜作曲、编曲及监制，黄伟文填词。不单只题材大胆，以甜蜜角度讲述多角恋、一个完全ERROR的爱情观，就连MV阵容亦令乐迷非常惊喜。女神谢安琪做MV女主角，张继聪成片尾彩蛋，粉丝看得开心之余亦深表感动，见证偶像凭一点一点的努力，赚取资源制作出大众喜爱的作品，阿Dee（何启华）坦言令粉丝感动是ERROR报答大家的最好方法。Comeback却遇上疫情，虽然未能面对面专访四子，不过ERROR仍然在线上与各位诉说新歌故事。

新歌题材大胆　四子深信何秉、Wyman功力

谈到与监制何秉舜的渊源，阿Dee说要追溯到《全民造星II》，当时何秉舜向经理人济哥提出想与ERROR合作，最终诞生《爱情值日生》。至于找黄伟文填词，全因四子深信对方功力深厚，阿Dee说：“Wyman帮MIRROR填咗好多首歌觉得好正，今次个概念好大胆，要有啲功力先组织到。我哋乱噏求奇掉啲嘢出嚟，睇下做唔做到一首作品，Wyman同何秉好快就判断到点呈现我哋想要嘅。”

新歌题材非常大胆，以甜蜜角度讲述一脚踏多船，阿Dee解释灵感是来自台湾艺人王先生的婚外情新闻：“王先生发生咗唔好嘅新闻，谂紧会唔会有首歌嘅爱情角度同呢啲有关。市面都有好多讲第三者、第四者嘅作品，想大胆啲以一个甜蜜角度去讲多角恋，Sweet得嚟又有ERROR风格。”

看首映遇上张氏夫妇　一口答应参演MV

MV推出两星期获得过百万点撃，193坦言观看次数虽然不算高，却不代表歌曲成绩：“120万点撃喺而家年代嚟讲唔算好好成绩，因为MIRROR一日已经超过呢个成绩。但成绩唔可以用View数代表，只系其中一个指标。首歌第一星期打入叱咤榜第8位，而且大家都钟意，开心我哋作品有其他人认同好听。”

今次找来张氏夫妇张继聪及谢安琪客串MV，肥仔（梁业）表示找谢安琪做女主角是一早计划好的事：“今次玩到咁大，MV要揾个份量劲啲嘅女主角，谂谂下谢安琪都好，咁不如揾埋张继聪。”他与阿Dee看电影首映时，刚好遇上张氏夫妇，于是二话不说上前邀请对方：“睇完戏即刻问佢哋，阿Kay问系咪睇完套戏谂到，我话本身就谂定咗。佢哋又好爽快答应即刻畀电话，等我哋联络佢哋经理人。”

阿Dee强调拖阿Kay非自肥　被爆拍摄时手心冒汗

四子与阿Kay有不同程度的互动，阿Dee就成功拖到女神的手。他再三强调没有自肥：“我好专业，拍身体接触嘅戏永远都系男仔尴尬啲。阿Kay有经验，佢可能Feel到个画面上要掂下手仔会Sweet啲，所以佢主动递起只手示意我可以掂佢。导演又觉得正呀，所以先掂，全部都系专业表现，绝对冇自肥。”此话一出，肥仔立即笑指：“Dee哥你扮咩，你本身就想，好明显畀咗钱导演，叫导演畀个拖手镜头，扮晒嘢话阿Kay做主动，人哋女仔人家点会咁主动，唔好屈人。”阿Dee再反驳：“收到小道消息系Kay畀咗钱导演，要求我掂佢。”

MV出街后，Kay在IG留言大爆阿Dee拍摄时手心冒汗，阿Dee解释：“系咁出手汗，（保锜：因为你有非份之想，所以紧张？）热呀，我冇非份之想，保锜你唔好用你角度切入我度。（肥仔反撃：喺溜冰场，𠮶日仲要咁冻！）知唔知溜冰场好热，等迟下开放返自己Feel下，唔讲太多。”

粉丝感动直言终挨出头　ERROR凭努力换资源

不少粉丝表示看完《爱情值日生》MV后非常感动，见证偶像由初初没有太多Budget，到今天找到张继聪及谢安琪客串，直言有一种挨出头的感觉。阿Dee坦承有同样感觉：“MV阵容同埋制作都成熟咗好多，比起以往任何一首作品。Fans嘅感动都系我哋报答返佢哋一直嘅支持，我哋嘅努力真系可以换到更好嘅资源，整到更好更高质素嘅音乐畀大家听。正如佢哋成日话，ERROR值得拥有更多，而家ERROR拥有嘅嘢开始愈嚟愈多，会继续用拥有嘅资源去报答大家一路以嚟嘅支持。”

歌词提到“这份爱／最重要入围／有位置就够／我没理排第几”，有粉丝解读成是ERROR在娱乐圈的心声，虽然肥仔指“好Care排名，希望首歌拎到冠军歌”，不过阿Dee却认同粉丝的解读：“我都觉得歌词有Double Meaning，但功劳喺Wyman身上。我哋Pitch出去嘅内容系冇，可能Wyman睇过我哋啲嘢，对我哋有一定了解，可能系佢睇到嘅一啲心声，ERROR做紧、挣扎紧嘅事，好应、好中、好钟意。”四子目前正忙于各自的Solo工作，不过193却为粉丝带来好消息，透露正筹备ERROR综艺节目，仲叫大家密切期待！