东张西望｜父亲遗体被列带有传染病　观众哭诉：好多殡仪馆都唔收

第5波疫情严峻，确诊者无地隔离，病者无床护养，连遗体也无处安放。今晚播出嘅《东张西望》，观众黄小姐嘅爸爸因为新冠肺炎引起并发症离世，由于遗体被列为“第2类”（带有传染病如爱滋病、丙型肝炎、禽流感、新冠肺炎等），所以好多殡仪馆都唔肯帮佢爸爸举办丧礼。黄小姐表示爸爸已经84岁，身为仔女都想安详地送最后一程。

“爸爸在世时，CT值系37，作为一个病人，如果CT值高于30，如果唔系肺功能变差、呼吸有困难的话，其实佢已经系一名康复者。佢已经冇新冠病毒喺身，但仲挂上一个咁嘅标签，令佢绦办法做到任何丧事，咁系对病人好唔公平。我只系想为佢守夜，但都做唔到。”节目中，呼吸系统专科医生梁子超表示CT值并唔适用于病情持续恶化嘅人身上，并指病毒有可能残留喺体内。

虽然喺卫生署指引中，“第2类”尸体必需要入尸袋以及不能进行防腐处理，并未有禁止瞻仰遗容、装身及化妆，但《东张》先后打去三间殡仪馆查询时，对方均表示遗体喺医院封棺后后才可以送到殡仪馆，唔可以瞻仰遗容、化妆，衣服只能铺在棺木上，亦有殡仪馆负责人表示会收取额外费用以作清洁、消毒。殡仪馆业商会理事长郭凯邦喺节目中，表示业界系可以为黄色标签（第2类）嘅先人服务，而准则就系将遗体封棺后再为先人办丧事、或直接送到火化场做丧事。