专访︱粉丝苦等三年 Jeremy@MIRROR终出单曲《半》：系最好时机
Unicorns等足三年，终于收到偶像Jeremy（李骏杰）推出个人作品的好消息，欣喜若狂在社交平台转发消息时，Jeremy同样急不及待与粉丝们分享这份最好的礼物。看到MIRROR兄弟相继“单飞”，等待的过程心急吗？他一脸认真回答“冇，觉得自己未够”。2022年2月22日推出单曲《半》，日子易记之余，对Jeremy来说，这是最好的安排。三年时间让内向的他累积自信、改善唱歌技巧，由以前最怕做访问，变成今天从容地在镜头前诉说新歌故事。
性格内向曾怀疑是否适合入行 敞开心扉靠与自己对话
Jeremy最新个人作品《半》讲述世界有很多面向，有黑有白、有善良有邪恶，但在好与坏之间，大家总会拒绝接受坏的一面。但作为一个人，是需要接受自己不同的面貌，了解、正视内心最渴望的，努力变成自己想成为的人。初入行的Jeremy曾拒绝接受自己性格内向，更一度怀疑是否适合加入娱乐圈：“以前唔钟意讲嘢、唔钟意表达自己，会收收埋埋。但入得呢行唔可以咁内向，有时会好拒绝自己嘅呢一面，又冇办法令自己外向，好矛盾不停挣扎好辛苦。而家慢慢接受、放开自己，多啲同人分享自己，慢慢打开个心就好好多。”
敞开心扉的方法，Jeremy以“好似好戆居”来形容，不过却十分有效：“同自己倾偈、问自己问题，‘你钟唔钟意今日嘅自己？’内心第一下声音就系答案，了解内心想法再慢慢调整。其实自己系想做得更加好，不过之前冇勇气、冇自信，对每件事都好惊，而家多咗自信，令自己做到想做嘅事。”
刘美君发掘妖艳气质 曾担心观众难以接受
参加《全民造星》时，刘美君发掘Jeremy独有的妖艳气质，同时奠定他往后的表演路线。在台上总是充满自信的他，原来曾担心观众难以接受：“好感激刘美君老师话我知可以行呢条路，如果唔系唔会有呢首Solo。过程有好多挣扎，惊太中性会令人唔舒服，唔够胆放开去做。”
三年来带来多个妖艳演出，背后却花了很大勇气冲破心理关口。直到演唱会上表演《Monster》后获得好评，令Jeremy信心大增，而新歌和MV继续采用擅长的妖艳风格，他直言要为听众带来窒息感觉：“每一次不停说服自己，你得嘅，去做喇。演唱会《Monster》𠮶种邪、妖、霸气令我觉得要做呢样嘢，Solo系根据呢个表演去谂，MV同首歌风格都系姣啲，令人觉得好窒息嘅感觉。”他透露MV造型作出了两个新尝试：“用白色眼线笔画咗对翼嘅眼线，搽黑色同红色指甲油。好担心会太过女仔，但出到嚟好Match音乐同环境，整件事啱啱好，好正。”
入行两个月完成人生愿望 出单曲希望大众更认同MIRROR
《半》讲述人的面向，同时亦提到人的欲望，问到Jeremy加入MIRROR后的欲望，他一脸满足说入行两个月已经达成：“想成为男团成员，跟住就系开演唱会，两个月就搞掂晒，人生愿望已经完成咗。呢段时间不断探究紧下一个愿望，而家想畀香港同其他地区观众知，MIRROR 12个人都有唔同特色，可以做到12种唔同风格嘅音乐。”
事事以MIRROR为前题的Jeremy，连出单曲都与MIRROR有关。他坦言出Solo的欲望不算大，尝试出是希望大众能更加认同MIRROR：“出Solo意欲唔系太大，本身好冇自信，好care身边人对我嘅评价。如果人哋畀唔到信心我，我就会退缩。而家尝试系想大家更加认同MIRROR，6位成员出歌有6种风格，我系第7个都可以畀到第7种风格，相信之后8、9、10、11，12都会有唔同风格。”
粉丝等足三年 Jeremy认为“一切是最好的安排”
纵然Jeremy出Solo意欲不大，Unicorns却等足三年。三年时间，Jeremy形容一切是最好的安排：“呢三年畀咗好多自信同力量我，除咗Fans，有11个兄弟喺背后支持我，令我更加有勇气去出Solo。啱啱出道时，好惊做访问，因为唔钟意讲嘢，好辛苦唔知讲咩好，佢哋唔会迫我但会慢慢引导我做访问，到而家可以自如啲去做个人访问，都系因为佢哋，好感谢佢哋。”
队友相继推出单曲，等待的过程心急吗？他一脸认真否认：“上年话有机会出，咁就延迟到今年。过程冇心急，觉得自己未够，今年系最好Timing。《半》如果系上年嘅我去唱，系唱唔到，因为首歌好难唱，需要多一年去训练自己，令自己更有信心去挑战Solo。所有嘢都啱啱好，就系最好嘅时间。”
花姐曾指声线太薄 努力学唱歌证明自己
在《调教你MIRROR》中，花姐曾列出Jeremy暂时未能单飞的原因，分别是身形太薄、高音唱得好但声线太薄，唱歌好听但持久听时感觉刺耳。重提当时的感受，Jeremy坦言没有特别难过，事关他知道自己存在的问题：“知有问题但一直改唔到，𠮶时未揾到好夹嘅老师，同埋唱歌方法一直都错。当时都觉得唱高音有啲吃力，虽然每次都唱到个音，但唔系一个靓位置，好似摙出嚟咁。不停揾老师打好根底，而家唱高音会实净啲，唔会好似以前咁尖。”
如今终于达到花姐要求，Jeremy在背后确实下了不少苦功：“花姐有讲我高音方面有时会尖，都特登跟老师学咗好耐，令把声厚实啲。仲有身形，会去做下gym，清楚自己唔好嘅地方再慢慢克服。演唱会时收到出Solo消息，《Monster》好高音好难唱，𠮶个表演都Prove到我嘅进步，令花姐有信心畀我出Solo。”
相信Jeremy在《全民造星》哭诉不甘成为隐形人的一幕，令观众深刻又心痛。Jeremy如今从容地谈起旧事，表示心态已经完全不同：“𠮶时比赛大压力，人气唔系好高，又受到批评，好多嘢加埋𠮶下就爆咗出嚟。而家出道三年，同MIRROR经历咗大大细细嘅风雨，而家唔系一个人，系11个人撑住我，成件事争好远，而家有咩事都会问佢哋攞力量，起码有佢哋就唔会孤单。”访问期间，他多次提到MIRROR，亦庆幸万大事都有11位兄弟在背后扶持，“最爱MIRROR”一员绝对是当之无愧，而他一直的努力，相信各位都已经从《半》中感受得到。
场地：212 Studio
服饰：Versace
Hair：Man Chan @ Chic Private I Salon
Makeup：Rainbow Chung @Annie G. Chan Makeup Centre