【有片慎入】暗黑厨师脚踩凤爪片流出　鼎爷：我都系用水冲下

有句说话：“出得去食嘢，就唔好理啲嘢食点整。”因为有时候总会流传几个饮食界处理食物的暗黑方法，真系唔知好过知。近日网上就有流传一条片，片段大约二十秒左右，就是酒楼厨师穿上水鞋，面前有一大盘腌凤爪，然后厨师上前直接用脚踩凤爪，左踏踏又右踩踩，过程更有几只凤爪跌落地。睇完条片，都唔太清楚厨师动机是什么，为了令凤爪更入味？其实可以用手嘅。有传闻食物跌落地下3秒之内拾起，食落肚会冇事，不过睇条片，凤爪直接触碰地面都不止3秒，食客见到一定会打冷震。

记者就此事就打电话问过煮嘢食出名劲的李家鼎点睇，鼎爷就话虽然家父曾开过大酒楼，不过他未试过在酒楼工作，对这种处理手法就不作评论。咁鼎爷煮食经验丰富，又会点样处理凤爪呢？他说：“咪就系揾水冲一冲啰，要去骨嘅话，就喺掌心用刀界一界，再用指甲尖整佢出嚟啰，就系咁简单，我煮咩鹅掌乜掌都系咁整。”相信正常都系会用一双洁净双手去处理凤爪，要腌嘅话，用手仲方便喇。

据知片段拍摄的地点，是位于旺角一酒楼。不过此酒楼经已结业，相信此片段应是旧料一则，不过大家睇完片，出去饮茶又会唔会避免食凤爪呢？