ERROR肥仔新歌Sell温情 193孖林明祯回味初恋自肥失败
宇宙天团ERROR两位成员肥仔及193同是1990年1月14日出世，适逢昨日齐齐生日，二人分别推出Solo歌。肥仔新歌《Dear MaMa》大谈亲情，MV更邀得影后级人马鲍起静饰演妈妈角色，获对方帮助带入戏，演技即时大爆发。 193新歌《再次Puppy Love》则是情歌一首，为了自肥，193找来林明祯一同回母校拍摄甜到漏MV，可惜计划却失败了。
肥仔过去试过发梦遇到亲人离世，所以触发他制作了《Dear MaMa》这歌，他说：“都知道大家好爱对方，但唔敢亲口讲句多谢，又唔想自己有任何后悔，新歌《Dear MaMa》就系代表我唔敢讲出口嘅说话，唔讲出嚟，就唱出嚟。”为了配合歌曲内容，今次《Dear MaMa》MV亦大卖亲情，肥仔更找来鲍起静饰演妈妈，因为对方予人亲切感，令他轻易代入对方就是自己的妈妈，但遇上影后，肥仔自言都有点怯：“同前辈合作梗系怯啦！但鲍姐Nice到一见面就同已经同你倾两句偈，畀人好祥和嘅感觉，唔会有隔阂，同想像嘅一样。”
肥仔更透露，多得鲍姐，MV中他轻易入戏，更喊过不停，他回忆道：“有场喊戏，起初以为自己唔知要演几多次，心谂最好一Take过啦！点知喊完一次，导演真系要我嚟多次，心谂唔系啩，点知呢个时候，鲍姐突然行过嚟摸下我个头，我就轻易代入返角色，又再喊多次，结果我前后喊咗半个钟！”肥仔坦言《Dear MaMa》是送给自己妈咪的礼物，希望能够制造惊喜。
至于193的《再次Puppy Love》，则以“初恋可以嚟多次”作狂想，193今次除了继《睡到三点》再次参与填词工作外，也全情投入MV的制作，他说：“一开始已谂到MV画面要有朦胧美，有以前8、90年代柠檬茶广告嘅Feel， 于是揾咗《ERROR自肥企画》兼《花姐ERROR游》的Writer阿辉帮忙度桥。”
提到今次找来林明祯担任女主角，193笑指事前跟阿辉要求自肥，剧情中最好加入一些身体接触情节如头贴头、脸贴脸的场面，不过最终事与愿违，193大叹道：“今次我返自己中学拍摄，都特登来来回回几次返去学校同校长倾，但我母校比较专注学业，校长睇完故仔之后话唔得，因为学校唔鼓吹学生谈恋爱，所以最好唔好有呢啲戏份。咁我梗系用咸湿仔角度，再问校长呢啲戏份可唔可以移师去公园或其他街道拍摄啦，但最终都系被拒，所以对校长……Respect！”其实《再次Puppy Love》MV还有3妹（193妹妹）、造星4 Candy及Yoyo、Delta T及霍哥@微辣客串其中，星光熠熠。
《再次Puppy Love》不仅MV很有画面，就连歌词都十分露骨，令人想入非非，不过193却说：“我又唔觉得露骨，如果觉得露骨就系你咸湿。今次唯一一句比较露骨，系‘曾幻想一天触碰你身躯 全日尽在被窝畅聚’，本身仲露骨，系‘曾幻想一天触碰你双腿’，如果用双腿就真系太露骨喇！”193指他写这句歌词时只是构思一个中学生，幻想自己三十多岁时，在某个周日早上，于美满的家里睡觉，但他忽然跳Tone再说：“但我知一定有咸湿仔谂咸湿嘢，我都唔怪你，我自己都系咁谂！”
既然昨日是肥仔与193的生辰，也特别请两位讲讲自己的生日愿望，肥仔认真Mode On道：“希望Error四子身体健康工作顺利，最紧要飞黄腾达，所有嘅作品都可以畀人睇到。”193亦衷心表示：“所有爱戴我哋嘅人都身体健康，唔爱戴嘅我唔care。同埋我哋4个可以今年可以有啲成绩做到畀大家睇，除咗电视上面，希望音乐上都做到成绩畀大家睇，大家见到我哋喺台上面攞奖，无论Solo、四个人都好，都可以有机会做到。”