专访 | 麦秋成提起四大天王最深刻郭富城 赞刘德华有气场
42岁的麦秋成于近日热播的无线（TVB）电视剧《异搜店》饰演二世祖“冯祖辉”。剧中的他自我中心，非常赖皮，不时声大夹恶威胁陈晓华和何广沛，相当难顶。然而，现实中的麦秋成却温文有礼。访问安排在餐厅里，他会绅士地主动为人整理、摆设餐具。虽然自认比较大男人，但不影响他与太太汤怡的关系。
麦秋成和汤怡生活上不时有意见分歧，但他却逐渐认定汤怡是值得相伴终生的“理想型”伴侣，他说：“一样米养百样人。即系一件事，你可以嬲一餐，但嬲唔紧要，你嘅反应系点？你会嬲足一日，定转过头就笑哈哈呢？每个人反应都好唔同，我哋之间揾到个好舒服嘅位置。”
场地：Chill Cafe Bar & Grill
摄影录制：叶志明
麦秋成自认大男人
下月便是麦秋成和汤怡结婚一周年。两人由重新见面，拍拖再到决定结婚，只用了不足一年的时间。夫妻关系方面，他笑言现在仍处于热恋中，两人做决定时会轮流揸庄，他谓：“我太太唔系小女人，好平均𠮶啲。就算我想保护佢，但佢都会有自主嘅时候，无论家庭、定妻子嘅时候，唔会话老公一定讲晒，我哋钟意比较倾计多啲。佢喺屋企会主理一个角色。（男主外女主内？）唔可以咁讲。因为佢主内就变成一个煮饭婆㗎啦！佢都钟意工作，但某啲事情佢比较叻嘅，咁咪佢Handle（处理）啰！大家Respect（尊重）大家。我哋成日问对方，你想点，你钟意点，然后佢又问返我，我哋都算和洽。”
育儿方面，他则会交由太太话事，但他们商议好，BB扭计，两人一定会企同一阵线教导。
汤怡拗撬后会主动道歉
麦秋成婚后愈发认定汤怡是“理想型”，他欣赏汤怡愿意主动低头道歉，他表示：“Suppose（假设）我同你嘈交，转过头我同你倾返件事，你知道自己错啦，你会有一日讲返对唔住，咁你人系舒服咗，佢咪就系咁，令我好舒服。如果有啲人，同你嘈交，系错㗎啦！但唔出声，唔讲返对唔住，唔认嘅，如果一个人大方就冇事啦，如果一个人小气咁就，系啰！每个人凹陷位唔同。”
婚后两人出街糖黐豆
婚后最大转变，除了变得更黐家外，便是同朋友出街，太太一定会相伴在旁。当初闪婚被部分网友攻击“好快离婚”，他一笑置之，说：“唔通你畀人讲两句会离婚咩？咁你结婚咁多唔认识你嘅人知嘅时候，佢哋只会产生两样嘢，一样嘢系羡慕，一样系妒忌，或者一样系好心唔好心。有啲人系Bad things，睇任何事情都系负面㗎嘛！”
同蔡思贝分手亦是朋友
人怕出名猪怕肥，有人再提起他与蔡思贝的旧情，他也淡然处之。他不时在公司巧遇蔡思贝，是朋友也是同事，他说：“喺公司一定有见面，撞到啰！佢开车我泊车，咪‘Hello！’好正常。我对上一次见到佢系台庆，所有Artist都会见到，冇嘢。我好少约出嚟食饭。系朋友。我入TVB嘅时候，佢都有打嚟问话，你入TVB呀？社交礼仪嚟。我都结婚生埋女，有咩所谓。”
42岁转型唔怕迟：演员呢条路可以行到70几岁都仲行到
说是多了人认识带来了麻烦，但做娱乐圈这行，有人闹好过无人提你。麦秋成年届中年才转型做演员，曝光率增加，但会否太迟转型？麦秋成不以为然，他认为：“演学生梗系唔合适啦！但演一个阿叔，一个成年人，冇问题㗎！演员呢条路，你可以行到70几岁都仲行到，你几时入去都得，演戏系一个人生经历嚟，会仲快拿捏到。”拍摄《异搜店》与李君妍有一幕双双被落催情药，而引发性冲动的激情戏，他坦言当初拍的时候略感尴尬，不过最后还是一Take过搞掂。
赞刘德华有气场 为陈伟霆弃张学友100场巡回演唱会
麦秋成自言来到了人生下半场，想做点不一样的事，他说：“上半生做咗啲体能做到嘅嘢，下半生咪试下其他嘢。”
身为知名舞蹈家，他曾与四大天王中的三位合作，最深刻的一定是合作最久的郭富城（阿王），但唯独未同张学友合作过，他曾答应了陈伟霆而放弃学友的内地100场巡回演出，他忆述：“编舞你话刘德华，我都有跳过佢嘅骚，走大陆巡回都系跳佢，四大天王都系唯一帮过佢排舞，佢气场好强。但工作时间好短，真系会以Super star望住佢去做，好唔同。阿王都系一个Super star，但Closed啲。你谂下排演唱会要用几多日？系唔同啲嘅。黎生（黎明）呢排我都有嘢同佢合作，佢系一个好Nice、好有想法嘅Super star。学友就一瞬间擦过，因为喺佢第一次嘅大陆演唱会，我选择咗做陈伟霆编舞，我拒绝做咗佢𠮶个100场巡回演出，我谂𠮶阵系2008、2009年嚟，𠮶阵就二选一，我都想做编舞嘅，𠮶阵时得𠮶28、9岁。唯一系未同过学友合作，希望将来有机会。”
近来他又与梅艳芳隔空合作，“被选中”的他深感荣幸，他说：“梅姐我都合作过啦！《梅艳芳》呢套电影，虽然系隔空合作，隔咗个现实。但好庆幸佢在天之灵选咗我做佢舞蹈电影参与嘅一份子啦！我觉得都几幸运。张国荣哥哥我都见过一次，但系就冇见过梅姐，不过真系呢个系天意。”
异搜店 | 盘点5年10套奇幻剧收视 有两套劲过《金宵大厦》变经典