御用强奸犯│ 黄炜溏原来系住家好男人 每日买𩠌煮饭畀老婆仔女
黄炜溏现职TVB武术指导，入行超过40年，担任武术指导之余，由于经常被监制安排他饰演强奸犯，所以黄师傅有“御用强奸犯”或“恶人”称号，但访问或是闲聊期间，黄师傅说话很斯文，半句粗口也没有，问到他有否被街外人误会，他说：“一个放咗工去街市买𩠌，再返屋企煮饭嘅男人，坏得去边？（你识煮饭？）好奇咩？屋企每晚三𩠌一汤都系我煮 。”TVB下次开拍烹饪节目可以考虑下黄师傅。
谢贤、三哥苗侨伟御用替身
黄炜溏师傅1981投考邵氏第九期南国演员训练班及第四期武术训练班，但邵氏影业在1984年左右开始减产，不少邵氏艺员那时涌到电视台或独立电影公司发展，而当武师或替身收入高，黄师傅亦是其中之一，试过一日赚七千元，而以前他经常担任谢贤、三哥的替身，1996年开始在TVB担任武术指导工作。
《陀枪师姐》首次演“奸”
学武之人为何会变成“御用强奸犯”，黄师傅自嘲“样衰”，他说：“其实我唔系好同意，俾人叫御用强奸犯、恶人比较贴切，强奸唔系做咗好多次啫，第一次应该系《陀枪师姐》，对手应该系吕珊姐姐，之后系石天欣...高海宁，反而恋态、坏人就真系演得多。”不过黄师傅表示拍这些“动作”戏，男演员很大心理压力，因为很容易出事。
做武师要懂得演“下靶位”
黄炜溏每次拍摄这些“肉搏”镜头，事前有不少准备功夫，“最重要保护女演员，唔好俾佢哋受伤。”要他即场示范，黄师传二话不说，即时配合，拿著假人碌在地上，重演《大药坊》强奸高海宁一段戏，画面要激烈，但其实完全没有触碰过女演员，能够有这完美演出，全因有丰富“下靶位”经验，做武师你要识做“下靶”，我哋被打得夸张，先显得主角出嘅拳够劲，我哋入行𠮶阵，同演员对招试戏，俾演员打到，指导过嚟闹你，但如果你打亲演员？唔会闹你，但你听日唔驶返工，点解？因为你打到演员即系唔醒目啦，我哋系要‘喂招’俾演员，等佢哋打得好睇，你打到演员就更加唔醒目，仲有㖞，有时啲演员打打下唔小心跌低，你又要识得执生，保护到佢㖞，咁就系一个成功嘅‘下靶’。”
要识“欺骗”观众
拍强奸戏除了要保护演员，亦要懂得骗术，要欺骗的是“镜头”，“导演要画面震撼啫，你做到效果就得，叫你扯烂件衫，唔通真系一手掂落去咩？”拍强奸戏要识迁就镜头，打斗戏如是，“试过一次重伤，之后我就好小心，到后期拍嘢有芒（显示器），个个导演都挂住望个芒，我就知道呃到个芒就得，俾到导演想要嘅画面就可以，当你明白呢个道理，其实所有嘢都系技巧。”
住家男人 爱煮三𩠌一汤
镜头前黄炜溏是十恶不赦坏人，但私下郤是住家男人，每日在电视城收工，如果是开日班，收工后必定到街市买𩠌，“三𩠌一汤系必定嘅，老婆就怕骨、怕酸又怕辣、个女就钟意食鸡翼，个仔乜都食，唔好食再多都唔夹多嚿。（放工仲要买𩠌煮饭唔辛苦？）唔好当工作系辛苦，有时习惯咗佢，之后享受佢，见到佢哋食多啖饭，你自己都开心啦！”
娱乐圈五光十色，黄炜溏这种“黐家”男人，可算是万中无一，不少同行北上发展，赚得盘满砵满，但最终输了头家，黄炜溏反而乐于平凡，从家务中找乐趣，他说：“出面返工就擒七打八、但返到屋企我鹌鹑嚟㗎，经营一个家庭唔容易架，见嘢就做啦，唔好分。”黄师傅凭著他的身手，养活了一家四口，长女中大硕士毕业，细仔读大学三年级，不过黄师传对家人很少提及工作，“佢哋知我做乜嘅，讲嚟做乜啫，有时食饭开电视见到啰，如果我系做替身佢哋更加见唔到啦，（受伤都唔讲？）我只系试过一次比较严重，其他都系皮外伤，讲嚟做乜？男人小小苦楚等于激励，明唔明？”