专访｜87岁罗兰拍剧一样要挨到凌晨︰拍到两点已经系早㗎啦
罗兰可能令新一代想到的，想必是“鬼后”、“龙婆”的印象，事实上，她真人极为亲切，跟扮演的恐怖形象完全不一样。罗兰姐4岁就参演首部电影《好女十八嫁续集》，至中学毕业后决定全职当演员，直至26岁，罗兰得到制片公司老板黄卓汉赏识，觉得她很适合演反派演员，自此演员就成为了她的终身职业。出道至今逾80载，罗兰姐仍然对演戏充满热爱，表示只要有好剧本她都会拍，正正是告诉年轻一辈如何将一件事做得专做得好，可能真的要用上数十年的时间去付出和投入。
的确，年纪渐大，记性会愈来愈差，记剧本方面，也不如年轻人一样快上手，而体力也一样会不及后生一辈，但众所周知，拍戏常常拍到通宵达旦，87岁的罗兰姐却想也不想的说︰“我从冇话限住要几点钟走！”那种专业，的确令人佩服。
摄影、短片：梁碧玲
剪接︰吴梓翘
大赞“孙仔”胡鸿钧好斯文 年轻演员记性好、快上手
近来播的《爱上我的衰神》，罗兰姐饰演一个“恶嫲嫲”，跟一班年轻演员合作，讲到在剧中跟她有最多对手戏的“孙仔”胡鸿钧，罗兰姐赞不绝口，“佢好斯文，好温柔，好阴声细气，唔系咁呱呱嘈讲嘢嘅，呢个戏里面佢更加，佢系唔出声唔驳嘴，你话佢系咪几得人钟意啊！”讲起新一代的演员，罗兰姐自认记性差，也不记得“边个打边个”，不过普遍来说，她认为年轻演员“好犀利”，“第一佢哋记性好好啦后生，同埋佢哋好快脆就上手㗎。”去年接连有参演的剧集出街，不过罗兰姐透露因为疫情的关系，乖乖留在家中，故中间有大半年没有拍剧。
拍剧时间不定加临时通知︰今日同你讲后日开工都仲有一日刨剧本
罗兰姐拍过的电影、剧集无数，被问到从影以来拍过最深刻的一部，她笑言︰“差唔多套套都会好深刻。”不过，她觉得一拍完就不应该记住这一部戏，“你一记住佢，你就入唔到第二个戏，所以我哋𠮶时最忙𠮶阵，呢个厂拍到咁上下又要过隔离厂，咁你拍咗呢个厂，一换衫过隔离厂，你就要将呢个厂所有嘅嘢全部洗晒佢，如果唔系你入唔到𠮶度啲对白，记唔到㗎，所以造成到自己系好快忘记晒啲嘢。”
拍剧辛苦，不少艺人亦有讲过在无线拍剧特别辛苦，因为常常要通宵达旦工作，不知何时收工。罗兰姐直言拍剧不赶，反而是因为时间不定，加上拍完一场，可能是极临时才通知你拍下一场，“你想问话‘我拍完今日，边几日再有啊？’唔知！答唔到，因为点解呢？剧本未出晒，所以答唔到啰，又冇得预计，只有佢话畀你听，佢今日同你讲，后日开工啦，咁都好彩仲有一日，可以快啲刨剧本。”
老人家没有被优待照拍到凌晨︰我从冇话限住要几点钟走
拍剧日子无法预计，当然连收工时间也无法预算，罗兰姐笑言︰“通常而家佢哋都话就吓我哋啲老人家㗎啦，但系算早极都要两点㗎！”她续言︰“因为时间关系，（下午）5点钟开厂，拍到8点，放食饭，放完食饭，咪又去咗一个钟，9点钟再开厂，拍到12点前放消夜。”不过，罗兰姐表示现在监制们都好好，会先拍老人家的戏份，她说︰“放完消夜再拍，拍到（凌晨）两点，已经系早㗎啦！你谂吓，啲时间有几多呢？所以我就从冇话限住要几点钟走，最好就今日有7场拍晒7场就最好。”罗兰姐表示监制们现在都好有人情味，“有次就听到监制走落嚟，（话）‘快啲啦快啲啦！放咗胡枫同罗兰啦！’个导演就快快快咁，都要两点啦。（两点返到屋企都好晏？）3点啦！冲得凉就4点啦。”她又说︰“如果系第日冇早班嘅就好啰，如果有早班就都要去㗎，（有时）有㗎。（好攰？）大家都系㗎，唔系净只我自己㗎啦，总之成组人要拍嘅，大家都系挨夜，大家都系要挨眼瞓。”
教导新人脸皮要厚︰唔好理导演闹乜！
做演员看上去光鲜，但其实背后的付出是不为人知的，罗兰姐表示︰“做呢行就系要预备咗，铁脚、马眼、神仙肚，仲要面皮厚。”何解要脸皮厚呢？罗兰姐指︰“因为有时出去拍外景，喺街度拍，又嘈又要NG，有时导演啱啱做着个新人，佢已经惊到震啦，个导演喝多几喝佢就更加大件事，NG多几NG，有啲导演好唔好脾气，闹两句，咁𠮶啲新嘅女仔就瀡瀡声喊㗎啦嘛，咁所以咪要脸皮厚啰！唔好介意。”她觉得最紧要做好自己， “唔好理导演闹乜！”
“喊戏”一般是很难拍得好，罗兰姐表示大概十年前，拍TVB剧集时，遇过一个新人，令她很深刻，当时新人要拍“喊戏”，“佢系喊唔出，导演就喺度忟憎。”罗兰姐问新人，想什么可以令他／她哭，对方表示自己未被人骂过，罗兰姐说︰“因为屋企家底好，阿爸阿妈都锡晒，未有畀人话过一句，点喊啫？真系喊唔出，咁冇计㗎嘛。（咁最后点？）最后好似导演就话‘由得佢先啦’。”
从影超过80年被劝勿退休 有人找拍剧都会拍
从影逾80载，罗兰姐坦言不少公司的艺员部同事叫她不要退休，提她“你唔做更加冇记性啊！唔好啊！”、“要郁动啊，要做嘢啊！”等等，所以她亦尝试当中。访谈间，罗兰姐虽然听力不佳，但说话非常有条理，好精灵，她笑言︰“如果有啲对白平时生活上都有讲㗎呢，就冇咁大问题，好似𠮶日我拍法庭𠮶啲，𠮶啲对白平时冇讲咁，咁𠮶啲就难入脑。”她指如果有人找她拍剧，合适的她都会拍。
虔诚天主教徒扮“龙婆”兼拍剧装香扮神 曾问神父释忧虑
罗兰姐是虔诚的天主教徒，曾随无线电视摄制队远赴梵蒂冈天主教教廷朝圣，但却不时拍鬼戏、扮“龙婆”，又会在戏中拜神等，她直言曾为这个问题感困扰，于是问神父，“（我系）天主教徒，我拍埋啲鬼戏，有时仲装香拜神，同我哋教义有冇抵触呢？”神父答︰“你系演员？（罗兰︰我系）你系做戏？（系）咁咪得啰！，你做𠮶个戏个角色，唔系你自己嚟㗎嘛，唔系你嚟㗎嘛。”于是就释除了她所有的忧虑。
点击下图重温罗兰姐的恐怖演出：
感叹现今爱情观不同 拍剧手法太真实︰可能我古老
现今的爱情观跟以往的不同，拍出来的爱情故事手法也有不同，罗兰姐坦言有点接受不了，“（拍得）好唔同，我得闲坐喺屋企睇电视，两个见到男女咁样，旧时唔系㗎嘛，而家就直情做晒出嚟，好表面做晒，但系以前一话我钟意你、我爱你，大家对望，跟住镜头就pan咗去一系落雨，一系就pan咗去边度，咁就代表咗佢两个好好，所以系唔同。”她直言现在是太真实，所有亲热戏都交代出来，她笑言︰“可能我古老，或者我追唔上时代。”
现在的爱情观念跟以往的不同，连拍戏的手法也不同罗兰姐说自己追不上时代，但有些价值反而是愈老土愈值得保留的，例如要脸皮厚、要活到老学到老，在罗兰姐身上学会的，是正面和爱惜后辈的精神。虽然已是殿堂级资深艺人，但她在专访中，对所有工作人员的礼貌和态度，的确令人深感敬佩。
同场加映︰陈诗欣、张秀文上年结婚同样嫁得好 细数《3日2夜》已封盘女神