万千星辉丨王梓轩《演斗听》尽情留念　同劳斯莱斯合照吐气扬眉

无线前日（2日）举行《万千星辉颁奖典礼2021》，音乐节目《演斗听》赢到口碑打入最佳综艺节目五强，绝对算得上超额完成。唱作人兼节目主持王梓轩与一班演斗band在颁奖礼红地毯上与劳斯莱斯合照，吐气扬眉。

《演斗听》节目因为budget所限，服饰只能有限度提供，要着完又着支持环保。今次行到红地毯又与名车合照，王梓轩说：“其实演斗band有机会去到颁奖典礼行红地毯已经好开心，但现实系红地毯嘅一端系颁奖台，另一端就系停车场，颁奖台确系有啲遥远，就算真系可以企到上去都系奇迹，不如我哋稳阵啲，望返去个停车场，见冇乜人，加上我哋成季都冇开开心心咁影过相，于是就即兴影辑相纪念。”

今届大会安排劳斯莱斯接载嘉宾，一班演斗band把握机会：“我哋趁颁奖典礼未开始，胆粗粗敲一敲个车门问一问个师傅，佢好好，借咗架车成个钟头畀我哋影相，造就咗我哋唯一一次咁有造型影相纪念。”最佳综艺节目最后由《声梦传奇》夺得，王梓轩觉得输赢并不重要：“难得我哋可以聚埋一齐，去消化、享受对我哋嘅一种肯定，真系多谢公司、多谢所有嘉宾，能够信任我哋倾力演出，造就到个节目，一个好好嘅celebration。”

同场加映：万千星辉｜红地毡盛况逐个睇　陈自瑶低胸大露背撼青春姚焯菲

👇👇👇即睇高清靓相👇👇👇