任达华被追问17岁女儿拍拖即黑面：佢都系钟意读书多啲

任达华（华哥）今晚（3/1）现身香港电台出席《2022年节目巡礼》。提到“宝贝女”任晴佳（Ella）早前被拍得与少男同行，疑似有新恋情。华哥表示：“其实𠮶日𠮶啲男仔系同学嚟，而且我都识嘅，佢哋由细玩到大，咁啱有同学生日，佢哋一齐去买礼物庆祝，咁呢啲系正常社交嚟嘅。（囡囡都开始长大，畀唔畀佢拍拖？）最紧要读书先啦。（有冇话几多岁先俾拍拖？）叫佢睇多啲我同琦琦（太太）拍拖先。（如果囡囡拣男友，你都有要求呢？）佢而家都系钟意读书㖞，佢冇呢样嘢。”

被问到女儿有否分享少女心事，华哥开始表现得眉头皱说：“其实我同佢都好多嘢讲嘅，大家会讲学校啲嘢，同讲做运动同身边朋友嘅事，咁样系好事嚟。加上而家科技都好方便，就好似我离开咗香港咁耐，我哋经常都会视频。（囡囡有否透露有男仔追？）冇㖞，佢冇讲过呢样嘢，因为我哋互相都有信任嘅。”此时，华哥再被追问女儿拍拖会否呷醋？华哥终按耐不住黑面说：“佢冇㖞！佢都系钟意读书多啲。”