全民造星IV．专访︱东东顾家好生性　自爆14岁就打工：15蚊一个钟

因为与老板KB（Kevin Boy，李健宏）的一句戏言，年仅21岁的美甲师兼模特儿郭东彩（东东）便踏上了《全民造星IV》的舞台，虽然Pre-round跳唱《侧面》明显五音不全，但她后来却愈战愈勇，到40强阶段时更是令人眼前一亮，与队友表演《Come on, Bad boy!》获得观众一致赞赏。东东既有外形，实力亦明显几何级数式大跃进，更深受网民欢迎，理应是女团成员之选，但她在比赛过程中发现自己对唱歌跳舞未有太大热情，所以与B组导师梁祖尧商量好，让晋级席位让给想成为女团的队友，在30强阶段时甘愿被列入“死亡名单”，最后无缘晋身25强，以及今晚（25/12）在九龙湾国际展贸中心举行的总决赛。

点击下图观看东东专访靓相：

这未免令人觉得可惜，但东东接受《香港01》专访时却指自己从未后悔，甚至觉得被淘汰时有松一口气的感觉：“我想番自己嘅生活，做番自己最想做嘅嘢，踩滑板、整指甲，同埋想试下学做戏。”等阵先，做女团同踩板、做戏真系有冲突？入队唔系会令美甲事业更相得益彰？“其实我系有谂过，我知道做女团系有好多机会，拍剧、接广告，但我钟意比较Chill，唔知关唔关踩开板事，我唔太想咁多关注，想要开心、放松、自由自在嘅生活，多过签一份死约去做你唔钟意做嘅嘢。我比较重视自己感受，无论做咩都好，最紧要都系开心，喺唱歌、跳舞里面揾唔到𠮶种火，可能冇需要继续发展落去。”

提到导师梁祖尧在节目播出后备受网民批评，更有人指他未能提升B组的跳唱实力，东东亦想为导师平反：“其实佢有帮我哋揾唱歌老师，帮我哋30个女仔一齐上堂，学点样开声，跳舞亦有揾帮手，其实佢好识去计划一啲任务畀我哋完成，同埋有帮我哋做练习，等我哋可以投入情绪入各个项目度。我觉得佢教得好好，只不过系镜头冇录到或者冇剪出嚟，但其实佢背后付出咗好多。（戥佢惨？）心痛呀，其实佢冇做错嘢，可能只系佢眼中嘅女团，唔需要太跟世俗嘅标准，想我哋可以有多方面发展。”

点击下图观看东东IG靓相：

与参加《全民造星IV》的经过一样，东东入行的经过亦是有一种误打误撞的巧合：“有一次帮阿徐（徐濠萦）嘅牌子影相，KB同阿徐系朋友，然后佢喺阿徐个IG度见到我踩滑板，就觉得我有少少潜质，就问我想见个面，有冇机会签约，我本身有睇开《玩爆你个肾》，觉得呢个人应该唔会呃我，件事都唔系好耐之前发生，系今年三月嘅事。”而她亦不讳言小时候曾发明星梦，但未有想过童年梦想竟然逐渐成真：“我细个好钟意K-pop，我有幻想过自己去韩国做练习生，点解冇去到系屋企经济条件唔许可，不过我好知足嘅，屋企完整，有三餐温饱已经好好。”

东东家境并不富裕，父亲是吊机工人，母亲亦曾要打工养家，所以她细细个便要帮手照顾小她11岁的弟弟：“而家唔难凑，同埋妈妈做番主妇打理屋企，BB𠮶时难凑好多，又要帮佢换屎片，又要氹佢瞓觉。（你好早出嚟做嘢，等屋企冇咁大负担？）以前住比较乡村嘅地方，14岁就系村里面做Part-time，我记得个老细话我未够秤，所以就畀15蚊一个钟我，我而家谂番起个老细都真系几仆X，哈哈！”中学时做过4年Part-time收银员的她又指自己读完大专后便投身社会努力赚钱：“我一直有畀家用㗎，系之前比赛冇返指甲份工所以零收入先暂时冇，不过参加《造星》真系要使好多钱，唔敢计实质用咗几多，净系知只系的士已经四千几，好彩而家已经挨过咗！”《全民造星IV》后，东东参加了几个试镜尝试获得拍摄机会，谈到目标，她的眼神马上流露出憧憬：“入行最想梗系揾到钱养家啦，跟住带屋企人去旅行！（入女团揾得仲多呀！）我而家收入都算OK，好开心好满足㗎喇。”

发型：Terry Yeung @ Yonda Hair
服装：HER