黄子雄成无线“御用有钱人”：编审唔畀我做草根角色！

黄子雄（Geoff）的送花论及对情人节的观点，简直道出天下间所有男士心声（花店东主除外），在无线前后13年的他，代表作有《同事三分亲》Vincent（细言生）、《爱‧回家》的查家泽及正在播的《乘胜狙击》三旧石，多演有钱仔或专业人士，简直是御用上等人，其实他是无线笋盘众所周知，不过Geoff就谦虚说自己不是，他接受《香港01》访问时说：“有钱仔？唔敢当，我会讲自己嚟自一个中上家庭，用比上不足、比下有余嚟形容啦，应该冇错，呢句中文我学咗好耐，哈哈。”

“细个OK啦，有得去外国读书（伦敦国王学院毕业主修Food Science and Management），返到嚟嘅工作都俾到我经济上嘅支持，我返到嚟冇问过妈妈攞钱㗎，有一个舒服的生活，想买嘅嘢我系买到嘅（小编即听到哗哗声），唔好哗住先，咁两三架法拉利我梗系买唔到啦（咁买一㗎啰？），但我唔会嘥钱系呢度啰，一架车系消耗品，虽然我买嘅车都唔系太平。唔系大家想像中咁富裕。”听到黄子雄这么说，相信大家都心中有数吧。

黄子雄母亲开办出版社，他从英国回流先在利乐公司Tetra Pak当marketing三年，之后有位亲戚介绍他到明珠台当主持，之后黄子雄得到戏剧总监曾励珍赏识，找他演长篇处境剧《真情》剧组，当时拍档是邝美云，这就开始了黄子雄的演艺生涯。

从演超过22年，黄子多演配角，不是亲生仔（无线经理人合约）的他亦明白游戏规则，不会在颁奖礼出现，他说：“我系一个极低调嘅人，我只系enjoy拍戏嘅过程啫，我钟意同人合作，将剧本变成一场戏，成场戏做得好，唔使睇个人我就好enjoy㗎喇，我系为呢样嘢㗎啫，有冇奖唔重要（唔想攞奖咩？颁奖礼坐下都好？），唔会，绝对唔会，我宁愿做其他嘢，唔系唔想攞，系根本唔会谂，游戏规则我都唔系太遵守嘅时候，我点会有机会去玩？”

黄子雄睇得化，但不代表hea，他是有火的，他说：“我会同一啲冇睇TVB嘅外国人讲，我系Bryan Cranston before 《Breaking Bad》，Bryan Cranston拍呢套剧之前，其实佢喺《Malcolm in the Middle》呢套处境喜剧做老窦嘅，好多电影、电视都会出一出，过下镜，好多人认得呢位演员，但讲唔到佢嘅名，直至《Breaking Bad》嘅出现，佢就街知行闻，我可能都系咁，有人知我成日拍戏拍剧㗎，但未知我咩名，我都等紧我嘅《Breaking Bad》出现，啲人就会知道我系黄子雄喇。”

但黄子雄未有《Breaking Bad》出现前，都想演技有突破，就是尝试一些草根角色，可惜，无线编剧不肯，他说：“有次我同一个编审倾偈，我同佢讲下次俾个做一个草根角色啦，编审话唔得，因为𠮶剧入面呢，有另外一个老板角色，佢话俾我做草根，就算几努力去演，观众睇落去，你点都唔系咁草根㖞，跟住班观众就会睇埋个老板角色，咦！呢个应该系黄子雄做㖞，咁就会一次过杀死两个演员，我都明白，我嘅戏路系狭窄咗啲。所以今次喺《乘胜狙击》做奸角，我系好开心。”无论现实或戏剧上，黄子雄都是想穷都难，真是幸福的烦恼。