郑嘉颖拍《仁医》初尝搭的士唔使畀钱：拍咗咁多套剧未试过唔收钱
视帝郑嘉颖今日（5日）抵又一城出席关怀脑退化症患者的慈善活动。太太陈凯琳（Grace）抱住仔仔送郑嘉颖到现场后便离去。郑嘉颖透露周末是家庭日，故不想错过家庭乐的时光，“一阵间可以陪佢哋去玩，梗系可以去啲小朋友钟意嘅地方啦！”临近圣诞，郑嘉颖透露有20多日假，但笑言唔想再Staycation，会按照惯例同家人开派对食饭庆祝，但仍头痕紧送甚么圣诞礼物给陈凯琳，“问咗好多，都唔肯畀任何hints（提示）我，又惊买咗佢唔钟意，都系𠮶啲啦！（珠宝首饰？）佢又唔系好戴𠮶啲，好彩。”
无线（TVB）台庆剧《星空下的仁医》大结局收视达22.8点，在剧中饰演“胡须医生”的郑嘉颖最开心是口碑好，更令他初尝搭得士不用付款的感觉：“我第一次咁大个人，搭的士唔使收我钱。落车𠮶阵，个叔叔就唔使我畀钱。佢话：‘我唔收你钱啦！唔需要收。’我话：‘唔好，你做生意，点都要收。’佢话：‘唔使啦！真系唔使啦！你拍多啲好戏畀我哋睇啦！’哗！我𠮶刻系好warm嘅，因为我拍咗咁多套剧，都未试过话唔收钱，点解胡须医生试到呢？咁系开心事嘅，多谢佢。”
现同TVB签一骚一个合约的郑嘉颖享受自由身，不抗拒到任何电视台工作，问TVB有否接洽他拍下一套剧，他则指暂时没有：“暂时未有嘅，到时睇缘分啦！隔5年再合作，可能之后再隔5年。（去其他电视台合作？）唔排除任何嘢，好角色、好剧本我都接。（有其他电视台接洽你？）暂时未有。”
TVB深夜时段重播《怒火街头》，问是否为视帝大热的郑嘉颖谷人气，他多谢TVB睇得起他，惟他坦言视帝奖项改变了他一生，希望奖项能够给未攞过的人，又强调高层票好紧要：“我都有㗎啦！我希望畀啲冇攞过嘅人啦。而家播紧《拳王》Shaun（谭俊彦）啦、张振朗啦，又操得咁辛苦。我觉得呢个奖可以改变人嘅一生嘅，呢个奖改变咗我嘅一生嘅。我希望Shaun又可以赚多啲奶粉钱啦！（私心Shaun？）我觉得佢哋两个都好努力。睇观众，高层啦！高层啲票都好紧要㗎！”
回归TVB拍剧，问有甚么不同，郑嘉颖大赞《仁医》是他拍过最高质的TVB剧：“我拍过TVB咁多（剧），我觉得《仁医》算系quality（质素）最高嘅剧，全实景咁济，除咗手术室，打光啦、啲摄影师、角度啦，我觉得全部都同以前好唔同。电影感咗好多，系朝住一个正确嘅方向行。”
即睇本年暂时的剧集（短剧不计）收视：
同场加映