专访 | 何依婷情绪差搞坏身体：一唔开心就会keep住食胃药

27岁何依婷（Regina）出道4年，拍过10套剧，今年首次担正做女一，在无线（TVB）电视剧《十月初五的月光》饰演新版“祝君好”。如此经典剧集，观众免不了比较新旧差别，加上演戏经验不算丰富，迎来批评声浪是意料中事。
何依婷不是零负评类型，竞选港姐期间已被贴上“炫富”、“拜金”等标签，最近仲被质疑忽然富贵，由太子旧楼迁居至红磡豪宅。虽然话大个女，但唔开心仍要依赖胃药。她说道：“我一唔开心就胃唔舒服嘅，我长期都依赖胃药。我希望我个人大个啲之后可以食少啲胃药，个胃、情绪可以再Strong啲，咁连药都可以唔好食就最好。”
摄影录制：梁碧玲

新“祝君好”唔应该照抄旧版：而家呢个年代边有女仔系咁㗎？

要演活祝君好不容易，尤其要被拿来与视后佘诗曼相提并论，压力不容小觑。有观众批评新祝君好“MK味浓”，新不如旧，何依婷平反道：“第一，个故事改咗啦，第二，如果同上一个故事一样，咁翻拍原意唔大，咁不如睇返旧嘅算，所以想加啲新嘢。君好嘅角色设定有少少唔同。旧嘅君可能好依赖初哥哥、依赖妈咪，其实20年后新嘅君好，而家呢个年代边有女仔系咁㗎？你要做一个畀旧版更独立啲嘅后生女。”

学识唔在意负评：我都冇做错事

是非不绝，加上对演技的批评，何依婷逐渐了解不能要求全世界都喜欢自己，相比4年前遭受负评时每日在家以泪洗脸，如今何依婷更为硬净，她坦言拍《十月初五》是无愧于心：“其实我都冇做错事，我点解要咁在意呢？好似我拍呢套剧集，我已经尽力做好佢。我系有进步空间，但呢件事上我无悔，于心无愧。坦白讲，新闻讲好多嘢都唔系真嘅。我以前睇娱乐新闻，我都以为系真嘅，我觉得人哋写出嚟一定系真嘅。但系入咗行之后，就会觉得，唉！真系唔可以信。（有冇嬲？）我觉得佢点样写都唔影响我人格啦！佢点样写我做错事，我都唔会做错事啦！可能畀人误会，有少少委屈，咁Ok嘅，可以承受到嘅委屈啰！”

情绪差搞坏身体要长期袋胃药

压力人人有，何依婷唔识表达自己，会靠喊抒发情绪。她说：“我谂Overall我唔系一个好识表达自己情绪嘅人，所以我唔系好识讲呀！但佢唔系一个病，未严重到要睇医生。遇到情绪，我要点样去抒发？我谂我会喊啰！但我个喊又唔系要人嚟关怀你，呵返你。我谂喊系一个抒发压力嘅渠道，但喊完训一觉就冇嘢啰！”情绪受困会影响身体，故何依婷要长期袋住胃药，她指：“简单可能系我打针啦……我打针要食胃药，唔系我惊会反胃，出唔到门口。”

无养家压力唔使畀家用　买楼回报亲恩

家人是她的避风塘。出身基层的何依婷无养家压力，父母甚至不要求收家用，何依婷现阶段目标是储钱买楼畀屋企人。她透露，以现时收入储首付不难，但未稳定到足够供楼。她表示：“父母对我好好，冇将经济压力摆喺我身上，我主要都要买礼物送畀佢哋，养家佢哋冇提过，家用从来冇问我攞过。我希望可以揾多啲钱，将我冇畀嘅钱一次过买层楼送畀佢哋。”

剖白感情生活：唔想喊住去求人哋原谅

专心冲冲刺事业的何依婷，以“佛系”态度揾男友，一切随缘。她有过两段认真的恋爱。有人云三年是感情一个关口，何依婷两段恋爱都在这里刹然而止，她直言无法忍受嗌交和冷暴力。她说：“大学之后就两个男朋友。都长嘅，两个都两年几、三年。但去到两年几三年呢个位，你就会发现，你对呢个人太了解，了解到系，你就觉得行唔住啰！其实两年几就系话畀你听，你同呢个人行唔行到落去。因为两年几，你就会发现同呢个人夹唔夹，行唔行得住。（你提分手？）系发生咗好多事，大家都觉得冇办法忍受啦！（系咪成日嗌交？）我系一个好怕嗌交嘅人，我好希望我另一半系一个好冷静同我沟通，唔好太激动、唔好发脾气闹我，唔好冷暴力我啦！”

她续指：“我以前会主动揾返对方，但而家我会觉得咁样好攰，你要去喊住求人哋，你原谅我啦！但好攰呀。耐咗你可以做一年、两年、但三年好攰！所以我好想两个人可以平心静气、沟通，解决问题，唔好Focus太多喺边个𠱁边个呀！呢啲好无聊，小朋友先做。”

想揾年纪相若伴侣：细过我好似姊弟

择偶条件方面，何依婷希望揾到个年纪相若、冷静成熟的伴侣。她说：“如果拣另一半我未必会想拣年纪大我好多嘅。因为我觉得系，另一半系陪你行一生嘅人啦，所以如果大家年纪差唔多，经历差唔多，大家会有种互相扶持、互相一齐成长嘅感觉。”弟弟都耍手拧头，她笑言：“细过我就最好唔好啦！咁就唔系一齐成长啰！咁我咪好似家姐咁，‘仔，你要乖呀！’”

何依婷否认签TVB 20年超级长约：除非我梦游签左20年约我自己唔知