何哲图有意撬旧将过档助东山再起　许廷铿认食过饭：承蒙佢厚爱

许廷铿（Alfred）今日（18/11）现身出席铜锣湾日本著名品牌三周年庆祝活动。提到旧东家前星梦娱乐行政总裁何哲图最近同余咏珊自组开新公司，传有意撬旧将过档东山再起。Alfred表示：“其实我同佢系有食过饭，真系承蒙佢嘅厚爱，但就未话正式地有一个正式嘅洽商。我谂佢都知我有自组嘅公司嘅，咁所以都希望佢新公司可以顺利发展。（佢有冇透露新公司发展方向？）我知佢一直都系唔会变嘅系，对音乐个份执着，呢个系佢最强嘅地方。”

提到是时候知恩图报何哲图。Alfred笑言：“我相信对佢系够感恩嘅，亦都坦白讲大家都有个共识嘅。因为𠮶阵时大家分道扬镳，都系好老土𠮶句‘因为了解而分开’，𠮶阵时我想学多啲嘢，而佢都好认同，就放手畀我去做。假使有一日大家缘份到咪再合作啰，一向都冇排除呢个可能性。（佢有冇开好条件？）咁又未去到呢个位，我谂佢新公司都系啱啱开始。”