星空下的仁医｜郑嘉颖抢救钟嘉欣母子晒演技　BB道具造价达5位数

无线台庆剧《星空下的仁医》进入结局篇，Eman章以芯（钟嘉欣饰）突然觉得个肚唔舒服更下体出血，要做紧急手术拎个BB出嚟，可惜因为确诊感染病毒所以个BB救唔返。网友纷纷指拍得太真喊到眼肿，整个手术场面相当逼真，据知BB道具造价达5位数﹗

片段一开始Eman穿上手术袍下体出血，正被推往手术室，钟嘉欣显露出做母亲的无助，握紧赶至身边的郑嘉颖托负要救BB令人动容。手术期间钟嘉欣一度心跳停顿，最终成功抢救，可惜BB出世前已无心跳，即使郑嘉颖声泪俱下抢救都返魂乏术，令人相当心酸。网友大赞手术场面极度逼真，由剖腹至取出连住脐带的BB，整个画面无打格非常逼真，据知BB道具造价达5位数，头发脐带等都按真实情况订制，落足重本。

Eman醒来后见不到儿子，即无助地望向众人，最终焚爷告知其儿子已离世；得悉残酷现实的Eman先是一脸悲恸，又带点难以置信，之后看到儿子遗体时，才逐渐变得激动兼不断自责谓：“对唔住呀！妈妈害死你呀！”焚爷不想痛失爱儿的Eman再承受自责之苦，揽上身指是自己失误害死Heman，Eman听毕即时泪如泉涌，并激动反问焚爷：“你讲乜嘢呀？你又话帮我睇住我个仔嘅？你讲乜嘢呀？”

之后Eman再与焚爷真情对话，承认自己有幻觉，并伤心地表示知道是时候放下儿子：“我知道BB已经走咗，我知道我唔应该再见佢，但我真系好唔舍得佢，我唔想自己咁清醒，佢之前仲喺我个肚入面，我连同佢Say声Sorry都冇机会。我好挂住佢，好挂住BB呀！”单是两场喊戏，嘉欣已成功演绎了多种复杂情绪，对于网民一致好评，嘉欣越洋受访时大表感谢，并透露入行以来每个角色，都有尽力去设计及演绎：“细个时演较年青嘅角色，喊嘅时候会简单啲；但章以芯资历相对多啲，我自己又进入咗另一阶段做咗妈咪，所以处理喊戏时会唔同咗，因为要顾及嘅嘢多咗，会好自然地深层次咗。”嘉欣又谓该两场重要喊戏均是由心而发、顺其自然：“我只系投入咗个角色，畀自己嘅身体语言同思维自然流露出嚟，再随住剧本嘅带领以及当日嘅状态，尽我全力去做好佢。”嘉欣又坦言做了妈咪后对演喊戏有帮助：“学套剧话斋，妈咪系有一种本能，我嘅本能就系更加connect到我自己嘅内心世界同情绪，即系痛可以更痛。”

谈到网民指嘉欣乃是届视后不二之选，嘉欣直言很感动：“再次多谢大家支持，真系对我好大鼓励，我都有成五、六年冇乜演过戏，大家都仲记得同支持我，我非常感动。我对自己演出系有信心嘅，毕竟我演咗戏十几年，未结婚之前我都拍咗成四十部剧，有好多训练同进步嘅机会。章以芯我系好期待去演嘅，我亦好感恩呢个角色畀咗我好多学习机会，无论演戏抑或处事，我好多谢呢个角色。”