江美仪忆首套剧做女主角　被郑则仕粗口问候：闹到性器官出晒嚟

50岁江美仪早是公认实力派演员，当年以模特儿身份入行，更是九十年代炙手可热广告商宠儿。加入电视台拍摄第一套剧，她坦言犹如天堂跌落地狱，更被Kent哥（郑则仕）粗口问候：“闹到性器官出晒嚟，姨妈姑姐都攞埋出嚟。”

九十年代江美仪与欧阳妙芝、周汶锜、杨琤成四大广告女主角，江美仪接受杨绍鸿、宝珮如主持节目《一起走过》访问：“基本上啲广告都系我地四个中㗎啦，本身做模特儿唔系为咗入娱乐圈，系因为一份工做一两日有成个月咁多人工，咁做咩做一个月啫﹗九十年代广告呢行真系揾到钱，拍洗头水广告之前我都好红㗎啦哈哈哈﹗同发哥拍完个广告就入咗亚视，本身发哥叫我揾杜琪峰，𠮶时无咩特别FEEDBACK亚视就揾我，就入咗去啦。”

曾经移民到加拿大，但因“揾唔到食”加上亚视招手，江美仪毅然返港：谂住返嚟拍套戏再走，点知咁就玩咗廿几年。𠮶阵入亚视第一套戏（《肥猫正传》）就做女主角，我同张文慈黄嘉明三个女仔都系新人。俾Kent哥（郑则仕）闹到趴咗喺度，但今时今日我真系当佢恩师。有场戏佢系辛苦啲，讲佢跌低再起身，你知佢身位，会好攰，我因为唔识就住拍外景时啲灯光，成日遮到佢脸光……𠮶次佢真系闹得好甘，我好想喊，但闹我都冇用，我真系唔识嘛！跟住自己心谂‘唔会畀佢再闹我多一次’”

江美仪为表示诚意，决定以行动证明有心学习：“以后见到Kent哥人未到声先到，一嗌我就话‘到’，咁就搞掂咗佢，冇再闹得咁紧要……系想话畀Kent哥听我真系想学，真系有听佢讲，但我未做到唔好闹得咁甘呀。（闹得有几严重？）闹到想匿埋喺车喊，娘亲系第一个，闹到性器官出晒嚟，姨妈姑姐都攞埋出嚟。（感到好hurt？）系！我𠮶时拍广告时系公主，skincare连打灯都唔使自己埋位，拍电视就自己顾自己，要自己mark衫，又要就灯又要就人，连服装都畀说话我听，所以初初系好唔惯。”