张明伟出骚TVB唔访问　无悔唱《银河修理员》被消失：冇做错啲乜

张明伟（Aaryn）近年凭无线（TVB）处境喜剧《爱．回家之开心速递》“佐治”一角成功入屋，但月初突然在IG宣布告别合作了3年多的剧组，他日前接受访问时提到相信“被消失”的原因与他7月中在元朗信义中学门外自弹自唱Dear Jane歌曲《银河修理员》为被记大过的学生打气有关，有指事件触动了艺员部神经，令公司突然不再让他出席宣传活动，也要求其身边同事取消赞好相关帖文兼远离他。今日（30/9），Aaryn受护肤品牌邀请出席活动，谈及与无线的合约仍剩下数月：“都要睇公司安排，都趁呢个机会沉淀一下。”又指公司未有任何交代，自己亦未能证实“雪藏”、“封杀”说法：“我自己都未必完全掌握现时系点。”而TVB今日亦有派员采访活动，但未有访问张明伟。

虽然工作受影响，但Aaryn丝毫不感后悔：“所有嘢都事出必有因，唔需要后悔做过嘅嘢，亦都冇做错啲乜嘢，纯粹系唱一首歌，随心唱情歌我睇唔到要后悔啲咩，当然大家有唔同谂法我控制唔到，但都尊重大家嘅想法。”2011年经艺训班入行的Aaryn转眼已经走过10年，会否对公司感心灰意冷，他就说：“冇话心唔心淡，我喺公司都一段时间，每个人都有唔同阶段，可能呢个系一个讯号，叫我尝试唔同方面嘅发展；日后嘅事讲唔定，亦都冇话以后唔返去或者系决裂，纯粹现阶段系角色去到呢度，暂时未收到新嘅工作，就尊重公司嘅决定，亦都要为自己打算。”

爱回家｜“佐治”张明伟32岁生日　获“补习社同事”齐庆生送别

爱‧回家｜“佐治”张明伟亲揭被消失真相　疑声援信义中学生出事

Aaryn亦饮水思源：“要趁呢个机会多谢《开心速递》嘅监制、剧组上下、演员，大家真系好锡我、照顾我，我以前啲戏好屎，佢哋真系一步一步咁教我、畀我尝试，呢样我系永远都感恩！”至于“佐治”作为补习社要员，他又表示有信心相关故事线不会有太大影响：“我好敬佩编剧嘅功力，一个星期出足七集，几乎年终无休冇得休息，日日都要写新嘅桥段，所以我唔担心自己离开咗补习社会对呢条故事线好大影响，我仲有心如（苏韵姿）呢个Partner，相信佢会掌控住呢个地方，有趣嘅事情会继续发生。”谈及《爱回家》的一班前同事日前也有为他庆生：“拍呢套剧除咗作为演员有增长之外，最感恩就系识到呢班朋友，无论发生咩事大家都系互相支持。”

至于接下来的计划，Aaryn提及公司一直都尊重他做音乐的一面：“而家更加专注做音乐。”作为乐队Charming Way主音及结他手的他表示想在音乐方面有更多发展：“想做多啲广东歌畀大家听，因为自己用英文写作比较随心，始终大家都话唱中文歌会仲正，嚟紧都想试新嘢，唔可以原地踏步。”