专访︱MIRROR工作劲忙粉丝担心健康 Lokman派定心丸：我哋顶得住
MIRROR正副队长杨乐文（Lokman）和江𤒹生（AK）推出合唱歌《虎道门》，贯彻两位型爆风格，MV化身日本暴走族，以充满爆炸力的Rap兼舞步带乐迷走入属于他们的音乐世界。歌词提到“正副分明”，比起明确地将他们划分成“队长”或“副队长”，Lokman和AK认为更多的是互相补位，性格和价值观的相近令他们合作得愈来愈好。“队长”对AK来说不单单是一个名衔，而是要肩负起“有事第一时间帮兄弟挡刀”的责任。假如MIRROR再选一次队长，二人依然会毫不犹疑，一口答应担任这个大压力却很有成功感的岗位。
采访，撰文，剪接：陈芷颖
摄影，短片：梁碧玲
Rap部份亲自填词 Lokman坦言过程辛苦却开心
“虎道门”是指舞台两侧的入口，Lokman解释穿过这道门便要忘记自我，尽情地在舞台上演出：“以前戏曲演员经过道门，踏出去就系忘记自己、投入角色嘅程序。呢首歌讲我哋喺舞台上嘅澎湃同奔放，同平时喺MIRROR见到嘅我哋唔同，个力量系再热烈啲。”MV中，二人化身日本暴走族型爆登场，AK感激美术同事的付出：“由布景，细致到鱼缸都系佢一件一件揾返嚟，令我哋拍得更加投入，将歌曲内容表达得更好。”
歌词Rap的部份由AK和Lokman亲自填词，回想起创作过程，Lokman说修改了很多版本，一开始只给人激烈和澎湃的感觉，却欠缺主题性：“修改咗好多次，录咗好多次音。慢慢调整到最后呢个版本。开心但过程有啲辛苦，同埋𠮶排有啲忙，真系要抽好多时间写，灵感呢啲嘢唔系成日有，每次都系Deadline先交到。”
比起明确划分“队长”或“副队长” 更多的是互相补位
歌词的一句“互相呼应／正副分明”，大概就是印证了Lokman和AK在队中担当的角色。比起明确地将他们划分成“队长”或“副队长”，Lokman认为更多的是互相补位，慢慢就起了微细的变化：“都系慢慢摸紧、试探下对方。你叻做啲咩，你唔叻我就补位，你见我攰就帮我答两句，好微细嘅留意同用心就有而家个感觉。”
性格和价值观的相近令他们合作得愈来愈好，AK说：“对每件事嘅错与对、观点都好相近，唔啱嘅事会极力fight back。无论系队内或者兄弟遇到嘅问题，有事都会第一时间帮兄弟挡刀，解决先。”问到他们是否在MIRROR担当哥哥的角色，AK坦言Lokman较像大哥哥，自己则是陪伴为主：“我系同大家食下饭、食下好嘢嘅存在，佢就系Mon实同提醒大家咁做会好啲，始终都系大佬做好啲。”身旁的Lokman笑言自己是强硬派，AK则是温柔派。
“队长”不只是名衔而是责任 大压力却有成功感
“队长”对他们来说不单是一个名衔，而是一份责任，从中的得着亦远超想像。AK说要肩负起为兄弟承担和解决问题的责任：“每日提醒自己要做一个更好嘅艺人，要做一个更加称职嘅副队长。喺我眼中，佢唔系净系一个名衔，唔系花姐掉落嚟，访问答多两句，而系要为兄弟、团队，公司承担同解决问题，要变得大个仔先可以帮轻大家。”
Lokman坦言担任“队长”很大压力，不过却非常有成功感：“队长个名衔对我嚟讲系老师，除咗督促我提点我之外，都系令我进步嘅原因。身边有好多挑战，花姐畀好多任务我哋做，我哋要自己谂方法去完成，训练咗好多脑筋，好多执行能力。虽然好大压力，但搞掂个Task系有成功感。”假如当初花姐没有命令二人做队长，让他们再选一次，Lokman和AK依然会毫不犹疑一口答应：“冇问题，交畀我哋。”
Lokman获赞似“法拉利” AK将机会与兄弟分享
Lokman曾在《调教你MIRROR》中坦言感到迷失兼“冇咗团火”，不少乐迷听完《虎道门》后大赞他“团火返晒嚟”，Lokman会心微笑说：“制作过程无意中挞返着团火，真系不知不觉，同AK、Carl叔叔，Oscar一齐研究，纯粹好想做好件事，可能就系咁纯粹嘅感觉就挞着返。”
AK说从来没有担心Lokman的表现和能力，更说了一件让Lokman非常感动的事情：“有一次同Agent. L食饭闲聊就讲起你，佢话Lokman就好似系一部法拉利咁，摆咗喺公司，你哋平时唔揸咋嘛，有法拉利都唔揸真系黐线。”他续指当初决定找Lokman合作，全因为相信他有能力：“点解揾阿Man Rap，因为我知道佢呢方面出色，总之你入啱油畀佢，呢Part你去尽佢，个表演都唔令我意外。开机𠮶Shot佢拍先，我哋全部人喺楼下睇话‘真系好有型呀Lokman，点解可以咁有型。’Agent. L嘅评价大家可能觉得好高，但我觉得好中肯，有佢喺度，表演上完全唔需要担心。”Lokman听后直言有一种莫名的感动：“我觉得系一个好高嘅评价，真心多谢，我会继续努力，做一部好嘅法拉利。”
AK将自己出Solo歌的机会与好兄弟分享，不少人或许会对他的决定感到疑惑，AK指花姐亦问过同样的问题：“花姐都有问我，难得可以自己出歌点解唔自己出，我问返佢，点解两个人唔可以出Solo歌，一个人先叫Solo？两个人都可以系Solo？”他直言明白资源有限，只是单纯想将拥有的机会与兄弟分享：“我系一个钟意群体生活嘅人，觉得好玩就够，同埋我唔贪心。今年有机会出到四首歌，仲有两只未出，下一只系自己，年尾𠮶只会揾多一个兄弟。资源系得咁多，系真系唔够，每位兄弟都有我好欣赏嘅技能，好想将我嘅机会同兄弟分享。”
“镜粉”担心MIRROR身心健康 Lokman：我哋顶得住
MIRROR工作非常忙碌，甚至连睡眠亦变得奢侈时，“镜粉”自然十分担心偶像的身心健康。Lokman说比起初出道，成员的心理压力已经释放很多：“一开始大家好多事唔识处理，所以会死顶，攰呀继续去先，背囊重呀孭住先，但孭孭下觉得唔对路。之前可能沟通唔多，有芥蒂时有好多误会，而家就会问‘点？攰唔攰，攰就拎嚟’，就系咁简单直接。大家面对压力从容咗好多，对唔好嘅情绪冇咁敏感，识得用另一个方法消化。”AK明白粉丝的担忧，不过比起没有睡眠时间，他笑言更怕没有工作：“冇工作好可怕！”
姜涛曾在IG连环发文宣泄情绪 Lokman戥对方开心：佢肯讲出嚟
Lokman亦向各位“镜粉”大派定心丸：“有阵时真系想休息下，但我哋真系好钟意呢啲工作。每一次都好Enjoy，呢个就等价交换，我哋顶得住。”AK亦竖起手指公说：“食得咸鱼抵得渴，冇问题。”相信镜粉可以放心了！
Make up：Giann Cheung @AnnieG. Chan Makeup Centre
Hair：Man Chan @Chic Privat i Salon
Wardrobes：Harvey Nichols, Giuseppe Zanotti
Styling：PIPA Creative
场地：Jas Party
点撃观看大量专访靓相：