【赤口】Joe Junior唱贺年歌　新年感恩：赐咗一个好老婆畀我

每逢大年初三，不少人为免“好嘅唔灵丑嘅灵”，听到初三“赤口”易有抛撬，一般都不会出门拜年。其实，只要心有正能量，往好的方面想，又边会咁容易会嗌交？就算嗌交，咪当间唔中嘈下，擦出下新火花！为了令大家心情变得更好，香港01为大家送上有“御用神父”之称，外表慈祥，人见人爱、车见车载的Joe Junior献唱的新年贺岁歌。信我，长辈说话有时不无道理，睇完会觉得好治愈。

大家以为Joe Junior系外国人，不会特别庆祝新年，但Joe哥哥话你知：“好多人都以为我系澳门出世，我都系狮子山下出世㗎，都会贺新年㗎！”所谓入乡随俗，Joe Junior的家人多在美国，在香港过新年，感觉都冇咁孤单啦！

除此之外，做开神父的Joe Junior，本身就真系信开天主教，但他深信“神爱世人”这个永恒道理，所以待人处事向来都比较宽容，更包容其他宗教。他所娶的太太就是一个实证，不过讲之前，Joe Junior先放一放闪光弹：“我觉得上天好好，赐咗一个好好老婆畀我，为我打点一切。”记者都被Joe Junior杀一个措手不及，眼镜都嚟唔切戴…之后Joe哥哥先入正题：“我老婆信观音，佢拜神我都会跟住去嘅。其实好多宗教都系导人向善，所以我都冇乜所谓，会尊重其他宗教。”

要对任何人都有包容之心，真系并非人人做到。与此同时，明明信天主教，跟老婆拜观音，唔会畀人质疑咩？Joe哥哥：“有人咁样问我，我就问返佢：‘咁你信唔信个天？’佢话信。我就会话佢好劲，因为天上嘅神都信晒，就连我妈妈都信埋。（咁如果佢话信自己呢？）咁就自罢自为啰，个天系会睇住我哋㗎嘛。”Joe Junior话咩宗教都唔紧要，最重要心入面有个“善”字。

Joe哥哥凡事包容的心态真的很值得大家学习。不过讲还讲，但人善总会被人欺，点都会有啲唔开心嘅。咁Joe哥哥又会点解决呢？不意外地，他的回答非常正能量：“上帝为你关闭一扇门，必会为你开启另一扇窗。所以唔洗灰心㗎，上天总会陪住你。”

听完Joe Junior呢一番说话，系咪充满正能量呢？啱啦！新一年有个新开始啦！Yeah！