李家声隔16年再演雷震子造型不变　起火劲闹TVB：好多人卸膊

《八时入席》终于散席，紧接在8点档播映的《财神驾到》，继续是黎耀祥担正，而首集剧情是财神乱用法力，继而跟天庭上的满天神佛闹翻，其中一位神仙，正是李家声饰演的雷震子，最神奇是该角造型时光倒流，跟16年前《封神榜》的雷震子，竟然一模一样，巨型V字额、半秃头配大尖嘴，再加背后一对鹰翼，再次饰演该角的李家声，也忍不住叹句“仲停留喺以前，唔进步咪退步啰。”

李家声接受《香港01》记者访问，对于十多年后再次饰演雷震子一角，他表示：“造型系一样，不过𠮶头套面具唔系十几年前𠮶个啦，咁多年烂晒啦，如果仲喺度，俾我都唔敢戴。(是否为该剧新造的？)呢个都系旧嘅，应该系之前有类似角色用过，悭得就悭呀嘛。(有冇异味呢？)咁又冇，有人清洁过嘅。”家声表示：“依家大陆都有播《封神榜》，再演呢个角色，都觉得开心、几好玩啰，你都话十几年前啦，小朋友睇住成长，系集体回忆。老实讲戴住个面具，揾边个做都得啦，咁都揾番我㖞。”

在首出剧集《季节》后，李家声总共拍过逾60出剧集，为人熟悉的有《封神榜》、《成吉思汗》、《仁心解码II》，见证着无线的剧集演变，但近年让人留下深刻印象的作品，却是买少见少，莫非无线又一次不识货，浪费演艺人才，他表示：“我实际50啦，呢啲样嫩又唔得，扮Uncle又唔似，依家公司又多Cable、歌手呀，有角色俾到嚟咪做啰，我半退休㗎啦。”记者表示黎耀祥已经52岁，赢过视帝，一样担正做主角。家声即说“佢位置好呀嘛，形象入晒屋，黎耀祥只得一个，李家声可以有好多个。”

对于近年的剧集质素，李家声承认确实是每况愈下，一直停留在以前，他更以韩剧作比喻，“睇吓韩剧就知，第一代几娘呀，依家唔同晒。(无线现时的剧集被网民边睇边闹？)乜闹呀？直头熄电视唔睇啦。”家声94年的电影《屯门色魔》至今仍是港产经典惊栗片，而在2013年《仁心解码II》，李家声再次饰演变态色魔，奸杀女学生石天欣，由于二人演得入型入格，十分逼真，被网民封为强奸戏最佳拍档，但之后却无以为继，家声至今仍然气难平，“可能觉得我过气啩？我哋呢种演咗30几年戏嘅演员，识得用嘅咪对套剧有帮助啰，不过唔系人人识用。好在捞咗咁多年都有“底桩”嘅，唔使烦供楼呢啲嘢，冇乜经济压力，有人俾咪做啰。”

李家声反问记者有否看上星期的《爱．回家》，笑说：“里面讲啲嘢真㗎，TVB里面好多人急功近利、卸膊呀咁，拍得好真实呀。(个编剧影射公司，都好大胆？)好事嚟㗎，儆醒吓公司唔好咁商业。记得以前我哋拍《成吉思汗》，边有分岗位？大家都系互相帮助。依家出去拍嘢，分咗4、5党啦。”家声近年少了曝光，正是不懂得揾山头埋堆，甚至2017有什么剧开，他也不知道，“唔会预早同我讲定㗎，有角色啱先揾我，到咗我呢个阶段，有时间咪去吓旅行，周围睇吓个世界啰。”家声再次强调“我半退休㗎啦”，不用求人，才真正活得逍遥。