【3日2夜】J2女神黄文意有学识　中大文化研究毕业：身体唔系禁忌

上回讲到TVB旅游节目《3日2夜》是美女发迹地，盛产大量大家平常都会走漏眼的美女。继上星期播出新面孔邝洁楹（Judy）仙气登场，但好嘢总不觉得足够，下一集又有靓女出场，就是24岁日系少女黄文意（Mandy）。节目预告短短30秒，见到Mandy身穿水著，完美身材尽现，随即引来不少网民热烈搜索，将Mandy起底，所以话想睇正嘢，可能要捕实《3日2夜》。

作为中大高材生，Mandy如今以水著成名，她又非常看得开，不担心日后网民只留意她的身材：“希望先以身材吸引佢哋，之后再留意到我嘅内在同才艺方面，著得密实嘅时候，都有观众钟意听我讲嘢，觉得好得意。”但Mandy始终都想日后在综艺及拍多啲剧，如今以性感引人入胜，真的不介意被人定型，焦点只关注身材？她续道：“我本身读文化研究，就有读到关于Gender嘅嘢，觉得身体从来都唔系啲咩禁忌，又唔会觉得太尴尬，因为讲起呢啲都好自然。”

讲到入TVB，随时有机会要挨，但Mandy却不介意：“就好似大学上庄咁，搏尽无悔。钱唔系最重要，最重要系追求个过程，的确系要辛苦挨更抵夜，但做到自己钟意嘅嘢，系好开心。”她讲到做娱乐主播会有底薪，所以不担心收入问题，但最难忘就是拍完《乘胜追撃》后，接住要开工做主播。不过Mandy今次在《乘胜追撃》入面多了戏份，更与陈展鹏有对手戏，几辛苦都值得。

问到现时的感情状况，Mandy就向大家预告：“因为我单身，所以节目入面，工作人员就带我到月老庙求姻缘。（咁灵唔灵先？）而家都有几个值得了解嘅对象，但最紧要心地善良同成熟。自己仲后生，无谂到结婚咁长远，两个人一齐，开心就够啦。”