造美人．专访︱沈殷怡懒理被指整容　练美娟认有微调：自信心强咗

ViuTV选美真人骚《造美人》是一个怎么样的节目，背后带着哪一种讯息，透过各式各样的滤镜从不同切入点观看，自然会有各有不同睇法，有人觉得节目疑似鼓吹女性拥抱医学美容，亦有人认为节目有物化女性之嫌，但无可争议的是，大部份参赛者愈来愈懂得欣赏自己、爱惜自己，外表变得更符合大众口味只属次要，最重要是她们的内心也比昔日更加强大，隔住个Mon都感受到那份转变的力量，好像因男友嫌弃而豪花40万整容的芷桥，因为几乎集集喊搞到个个想兜巴掴醒她，但她后来却悟出爱自己的方法，单单一句“我想向前望”，便已令观众动容。
主持兼首席评审强尼（许博文），以及一众参赛者“经理人”练美娟和沈殷怡（Shirley）亦佩服佳丽们四个月来的180度改变，尤其是知道她们参赛前如何“甩皮甩骨”，强尼说：“第一次睇到佢哋，真系觉得医美都帮佢哋唔到，觉得佢哋真系几岩巉，如果系抱住一个睇选美嘅准则，初段真系冇乜人系靓。”
撰文：陈栢宇
摄影：叶志明

说起靓、美丽等概念，既可以直观，望落去赏心悦目便是靓，亦可以复杂处理，用五官、身材比例等量度，强尼承认孭起节目之前曾经迷茫，要怎样拿捏好标准，去拣出最靓的一位参赛者，然后发现自己原来早已不经意患上审美疲劳，答唔出到底何谓“靓”：“好似大家睇韩剧睇得多，睇到对‘靓’开始模糊，因为个个都靓，靓到挑剔唔到，但以前唔系咁，你一睇王祖贤、林青霞就觉得好突出，但而家嘅靓冇晒Signature，因为有技术，个个都有机会追求同一样嘅嘢。”

也许真正的“靓”不是单纯讲求望落够好睇，不是黄金比例客观数据，而是能够找出一个记忆点，让脑海盛载着其美好：“我好记得，Angela Yuen（袁澧林）出嚟时，佢好受欢迎，我就自己谂点解Angela咁受欢迎，我觉得系过去好多年睇太多韩剧，习惯咗单一标准嘅靓，Angela Yuen出嚟𠮶种文青风，有一种反朴归真嘅感觉。”而沈殷怡对一班参赛者的感觉，亦似乎印证了这种看法：“呢一行个个都系靓女，但系靓之余，点样令人哋唔会忘记你，唔系只系靓咁简单，呢班女仔，如果只睇总决赛，你会话‘有几靓啫’，但你由头睇到尾的话，我会话冇一个女仔我系忘记到。”

一班佳丽除了做运动减走赘肉，还会在脸上施打聚左乳酸、透明质酸和肉毒杆菌等令自己变靓啲，当然总有观众对微调有所保留，亦有观众持开放态度，练美娟便与后者同一阵线，更指自己愿意接受医学美容：“不过我唔需要，我而家系靠做运动减肥，我嘅谂法系，如果做咗之后令你自信心满满，咁Why not，又冇去伤害人哋，自己做嘅自己负责任，自己唔好后悔就可以喇。”她更指自己最近都有“微调”：“我整咗把声，切咗瘜肉，我都觉得系微调嘅一种，而呢个都系呢个节目畀个我嘅启示嚟，令我的起心肝去做呢件事，而家把声清脆咗，我觉得我工作机会范畴会大咗，我自信心都强咗。”

To be or not to be，强尼认为最重要是为自己，因为即使你如何委身迎合他人，对方本身不接受你，总会找到机会挑剔你：“所以我唔会介意另一半做医美，每一个人对自己生命嘅追求都唔同，有人钟意追求打坐，我可唔可以叫佢唔好打坐？冇嘢㖞，都系佢嘅追求，其他人冇权话唔好。”

一直以来，不少香港艺人都被网民质疑整容，类似报道亦常在报章、杂志出现，沈殷怡也是其中一位被怀疑的女星，而她亦指入行前已经开始听到相关批评。“我个人系真嘅，但系就算我答百万次真，都有人觉得系假，我已经系懒得为自己辩护，我参与呢个节目，一开头嚟讲系有Concern嘅，当大家嘅抨击风气系咁强嘅时候，世人嘅误会已经咁深嘅时候，你再踩埋一脚参加呢件事，大家会唔会觉得我系做新闻呢，但系我觉得我更加要参与，我更加要话畀大家知就系，因为其实呢个节目就系学识点样接受抨击，点样有强大嘅心脏。”她更称若要执着于莫须有罪名，受苦的只会是自己。

亮相幕前，受人指点，在所难免，练美娟坦言入行以来也受过不少批评，“唔上镜”、“肥”、“粗鲁似男人”，要几尽有几尽，但她从不刻意回避Mean爆Comment：“我唔会话因为唔开心而唔睇，佢哋每一个表达嘅意思都唔同，亦用唔同嘅方法表达啲意思，你攞咗个意思就可以喇，例如话我好肥，可能我真系需要Keep呢，拎咗个意思之后自己再调节。”

外界虽然对女艺人特别苛刻，但针对男艺人的批评也不少，“全能强尼”从来不是卖靓仔，但“口痕友”总会见位就入，批评他“唔靓仔”、“老是常出现”，对，“老是常出现”对他们来说也是错。“呢个行业唔需要靓仔先做到，我做紧嘅嘢，如果我靓仔应该会多啲嘢做？但系𠮶样嘢唔属于我，如果我系一个靓仔，我条路行过嚟就唔系咁行，唔会得到我今日脑袋里面嘅嘢，如果我系好靓仔，15岁就做跳唱歌手，我就唔会系一个主持，我就唔会喺我而家个工作范畴上做紧我做紧嘅嘢。”应该怎样看待批评，强尼坦言分类好重要：“好与唔好，好嘅，多谢，唔好，我要Take几多？我Take晒？我真系唔知佢个出发点系点，纯攻击？我系唔钟意你呀，当我唔知你个人嘅用意时，我点会攞佢句说话放到咁重啫，如果系咁嘅话，我太愚蠢喇，我太冇智慧喇。”

明晚（26/6）《造美人》八强正式诞生，经过三位主持人悉心调教，一众参赛者固然进步不少，谁人最后跑出赢冠军，重要，也不重要，因为她们的终点绝对不是7月3日播出总决赛，路还很长，最紧要行得有自信。练美娟以过来人分享忠于自己、爱自己是一样多么重要的一件事：“我好记得有个前辈同我讲，佢话‘你咁样嘅性格，大癫大肺，你唔会红，唔会有人钟意你，因为娱乐圈、电视台唔会接受咁贴地，咁粗鲁嘅女仔’，但系入咗嚟ViuTV呢度，我觉得系相对地自由度大，观众接受能力比较开放，喺呢度我觉得我揾度大家喜欢我嘅地方，正正因为我冇Take，所以有人至有人钟意我。”作为观众嘅你，又Take唔Take到？

造美人︱10强摆甫士影写真斗索　Semi靠一句粗口Chok出完美表情