好声好戏｜亲解“鸡仔声”因由　黄翠如：细个气管唔好

黄翠如早前上TVB节目《好声好戏》被主席评判李家鼎批：“唔好做演员喇，去配音好过，做演员麻麻地。”汪明荃（阿姐）亦直言翠如的声音太卡通。节目上黄翠如亦都直言，说：“我自己演戏以嚟系成日畀人抨击把声，所以我成日都觉得咁不如你畀个哑嘅角色我演算喇。”今日（28/05）她出席澳大利亚楼盘活动时就分享了一次令人印象十分深刻的，被批评的经历。

黄翠如接受《香港01》访问时说：“我21岁入行，做主持已经有好多唔同嘅意见，喺cable嘅时候仲收过信添，有人写email入嚟，话我完全冇主播嘅气质，唔够专业，讲嘢有懒音，好鸡仔声，成个形态唔系主播感觉，叫公司抄咗我。”

她续说：“𠮶时我好冇自信心，𠮶时啲同事都知，叫我去啲大嘅影展，我系唔敢去，因为觉得自己冇呢个能力，但系对我嚟讲唔系一件伤心事，我接受咗自己唔够好，咪努力啰。我21岁就入行，其实咁多年嚟，都已经有啲习惯咗睇唔同嘅意见，去到而家更加（习惯）。每一个艺人都有好与坏嘅意见，你问我，其实都要有一份勇气，但系我都会尽量睇晒所有意见。”更谓香港观众其实很专业，所以他们的意见也不可忽略。”

她又说，拍摄剧集《那些我爱过的人》时，因为剧组都觉得她不像一位妈妈，所以大家就提议她压沉声线去演出。她说：“但系出到嚟，大家（观众）就觉得呢把声好唔自然。”表示这一次演出是为自己上了一课。“𠮶次之后我谂过点样做得更似一个妈妈，同时唔靠把声，同时我都嬲自己点解要选择咁样去演。”她坦言，其实鸡仔声等问题还存在的：“可能因为细个气管唔好，所以讲嘢成日都唔够气，例如讲对白头几句够气，但系讲讲吓就会愈嚟愈细声，所以我而家会去跑步练气。”