无线连点击都要食尽　睇坤哥自弹自唱焗装新app

TVB明年4月将会推出应用程式“大台网（Big Big Channel）”，形式就好似早前香港hit过的直播app 17。TVB的艺人可以透过这个App去直播自己唱歌，又或者同Fans倾偈甚至自拍创意短片，诸如此类。据知都有额外收费部分，例如睇艺人要开演唱会，用户睇show畀唔同价钱，就有唔同享受；而装了App的用户就可以睇直播时“送花”畀艺人，艺人因此都有著数，按like数当show钱，越多人like就越多钱收，可以当是第二个揾外快的工具，吸引不少艺人未来要积极吸like揾钱。

不过，好多TVB有艺人都是以Youtube拍片起家，例如黄建东、吴业坤及张彦博等。如果“大台网”推出之后，TVB又会否要求相关艺人日后都要拍片放上“大台网”，而要放弃Youtube？又或者限制艺人在Facebook、微博等社交平台的曝光率，艺人亦随时要“将最好留给TVB”，即系观众想再睇坤哥自弹自唱，亦要焗住装“大台网”个App，看来无线系连网上Hit rate都食埋！

《HK01》记者就有关情况问过近期网红兼即将参与“大台网”的黄建东，他说：“曾经我都有问过类似问题嘅，公司就话可以喺每个channel都有啲，不过我谂有啲特别嘅片就要摆返‘大台网’，同额外收费item里面，或者喺大台网嘅话，就会拍返同TVB多啲关联嘅片，宣传下剧集，我都想两边都可以Balance返。”不过，问到“大台网”与Youtube，哪一个多钱赚啲？黄建东坦言“大台网”应该多啲。

另一方面，先不讲“多like有show钱”制度，有指TVB都会要求艺人在“大台网”保持活跃度，问到黄建东会否觉得大台网一出，有多样嘢要谂，分身不暇？他反而不太担心：“公司的确都有同我讲要度多啲嘢，创意可以源源不绝嘅！我谂都主要行搞笑路线，除咗唱歌，都会谂下啲得意嘢。”至于分红制度似唔似要跑like数？黄建东表示：“都唔似嘅，始终网络世界有好多人，自己嘅人气都系呢两个月系网络上面得到。”