白只一尝心愿舞台剧做惨情戏　杨淇死足几次够凄美：喊到收唔到声

近期香港疫情转趋稳定，多个大型表演节目陆续出台，游学修、杨淇、DJ当奴、白只、朱栢谦等合演改编自小说《甚么天长 怎样地久》的舞台剧《久天长地》，日前拍摄宣传海报。白只最近不停演出舞台剧，他笑言不是“转行”：“咁我都系舞台度出嚟嘅，只系中间走过去做音乐，得闲又去拍电影，呢个时势有剧揾我，梗系返嚟‘屋企’啦。依家我都做紧几个骚，我排剧排到半夜，之后赶嚟影相，影完即刻去排戏。其实我舞台剧一直做喜剧，自从拍咗电影，被人定咗型我好阴沉，连今次舞台剧都要做惨情戏，不过叫做有得做正经戏，一尝心愿啦！”

女主角杨淇率先剧透，自爆角色要死足几次够凄美：“因为故事都有穿越成分，所以预咗要死足几次，今次剧本都‘惨惨哋’，不停要我哋勾起痛嘅感觉，所以我不时捉住Wasabi问要咩类型嘅痛，我都担心排戏会喊到收唔到声，加上做舞台剧系现场对住观众，如果要心痛到流眼泪，咁就演技大考验。”

游学修型格上阵，很快投入痛心情绪。他指同剧演员够分量，舞台上交流过足戏瘾：“今次大家关系都好close，好似我同白只系校友，导演系白只演艺学院嘅老师，监制又系演艺大师姐，喺前辈面前更加要打醒十二分精神！过去一年我投放比较多嘅时间喺网媒，呢次重踏台板感觉，都有啲啲唔同，但作为表演者系享受观众即时畀你嘅反应，好想快啲到9月开骚。佢哋好早就揾我做呢个剧，当时我嘅网台都未开，但系受到疫情影响，依家网台上轨道，要大家夹时间排戏，但系我太爱呢个故事，我直情想改电影版，到时睇吓有冇老板投资。”