何远东激减80磅告别肥仔形象　最兴奋入连锁店试衫：以前唔够胆

何远东今日（28日）出席剧集《爱美丽狂想曲》的宣传活动时，因为摆脱以前的肥仔形象，身形比以前瘦削了不少而成为众人焦点。他透露自己最高峰时体重达280磅，现时已经减至200磅：“其实有keep住做运动，但你知我真系忍唔到口，薯片、炸鸡、pizza我乜都食戒唔到，所以减肥产品同运动系相辅相成，要有个平衡。”他坦言减肥的过程一定要保持开朗，如果经常不让自己吃东西会变得不开心，想瘦也瘦不到，而且亦不要订立一个不切实际的目标给自己：“我冇心急追自己话一个月就要减30磅，但系一个月10磅有冇可能，咁就绝对有可能！”

何远东表示自己最大的感受是终于可以光明正大踏入连锁服装店试衫，整个人都更加有自信：“我而家呢条裤都系喺连锁店买，我可以入到去求其拎起条裤都入到去试，对于一个肥仔嚟讲好深刻又开心，因为以前真系唔系好够胆，个sales又唔够胆推你，‘其实何生，呢件衫唔系好啱你㖞。’，发现想穿个袖都穿唔到嘅时候，真系有苦自己知！”

他以前因为肥仔形象深入民心，会否担心减肥后要另觅戏路？“我又唔系好担心嘅，最紧要演技系不变，而家只系外型有另一番风味畀大家睇，咁我都期待一个新嘅角色嘅，睇下自己有冇机会可以挑战到。”虽然娱乐圈中有不少演艺学院出身的演技派，但即使有扎实的演技机会都可能远少于一些没有演技背景的人，作为演艺学院出身的一份子，何远东表示不能因此而气馁：“做艺人真系唔可以心有不甘，黎耀祥都讲过：‘一命二运三风水’，运气喺呢行真系占好大部份嘅，实力一定要有，但又唔可以两边都冇，所以点都要装备好自己，机会嚟到中就系中，就好似而家都有人认得我‘你杀过阿妈’、‘你做过出租车佬’、‘你系龙猫’咁！”