【平安夜．有片】伪毒坤哥圣诞冇女陪　鹫哥闹醒毒男：使惊冇女?

“Single Bell！Single Bell！Single all the way！”圣诞节又杀到埋身，一众单身人士非常头痕。以前有MSN、ICQ就话可以扮offline当出街啫，但而家又点制造自己有“不在家证据”呢？Come On James，成熟一点好不好！无得出街真系好惨咩？香港01就话你知：只得你无街去？You Are Not Alone！娱乐圈虽然多姿多采，但咪又系有人都系无街去！

钻石马国明

就好似马明，他已晋升为著名的“钻石王老五”，今年圣诞会去边？马明就透露会到外地登台揾外快，对于自己单身第N年，似乎都非常豁达㖞！“我咁大个仔，都试过好多年无拖拍，但我又觉得无乜所谓，做人要活在当下，我有朋友有拖拍，佢就嫌好烦；到无拖拍时，又嫌好寂寞，咁你有无拖拍都唔开心。”马明认为Lonely Christmas咪Lonely Christmas啰！“咁咪享受一下个自由啰，无拖拍有无拖拍嘅好处㗎，周围望下女仔又无人话你，都系一个自由嚟嘅！”

伪毒吴业坤

安慰唔到自己？出名伪毒的吴业坤坤哥都话要自己过圣诞：“听到‘伪毒’呢个名，边有女性朋友肯埋身？我都安排节目畀自己，一个人去睇赖慰玲嘅舞台剧。”坤哥讲到自己过圣诞的次数，多到犹如天上的繁星，大多数自己打住Online度佳节：“咁样都几型呀，都唔会特登扮出街。”“伪毒”坤哥咁讲，信不信由你啦！

铁汉李家鼎

仲未够的话，不妨听下充满历练的鼎爷点讲？“我40几年来，圣诞都要开住工过，但有工开咪好啰！”咁有得过想点过？“最想同班倾得埋嘅朋友、细路仔、孙仔开开心心咁过啰。”系啰，唔好放到无人陪咁大啦，就算自己一个人，仲有家人亲人嘛！

鹫哥吴岱融

系都觉得无人陪唔安乐啊嘛？等鹫哥吴岱融点醒你：“做咩？担心圣诞节无人陪你过呀？好心你啦，无咪无啰！有啲性格啦，有咩所谓啫？”系啰系啰，鹫哥就淡定啦，听完之后，系咪觉得好治愈？其实自己过圣诞有咩好怕㖞？