【台庆颁奖礼】马国明继续陪跑　讲视帝好葡萄：喜剧都唔系攞奖戏

无线《幕后玩家》玩完，接住播放的《流氓皇帝》终于让观众心情轻松一下，之但系男主角马国明就未必咁轻松，事关过几日（18日）便是台庆颁奖礼大日子，马国明只凭《为食神探》便同廖启智、黄宗泽、黎耀祥等争视帝，唔通今年又陪跑？

马国明今日为宣传《流氓皇帝》出席花车巡游，由中环游到西环，他全程保持微笑却没有表现得很兴奋，而途人要求合照他都有求必应。问他有没有信心赢视帝，他毫不考虑便回答：“冇，我好随缘，其实呢两年我都好随缘，首先上年《枭雄》我系客串，今年我啲剧都唔系啲攞奖嘅戏，系大家笑完就算嘅戏。大家心照，有啲戏好似贺岁片咁，笑完攞个气氛，唔会攞奖啰！所以今年当开party啰！”

【无线台庆颁奖礼．专页】

正所谓“一理通马国明”，讲到尾公司叫你拍什么就拍什么，无得say no！他愈讲愈明，愈讲愈酸溜溜：“可能公司想训练我拍喜剧啦！其实我对演喜剧冇乜信心，但作为一个演员又应该咩都磨练下，唔可以话避咗唔拍，同埋难得仲喺TVB，TVB系好好嘅学校，无论你套剧收视几差几多人闹你都好，你都仲有机会拍戏，但到你将来出咗去就唔同喇！你一两套死咗就真系拜拜。”他继续讲：“你谂下拍喜剧有几可攞男主角（奖），周星驰有冇攞过男主角奖？将来有机会出去嘅话咩都要得，唔通到时先话唔识拍喜剧咩。”马国明前后讲了两次将来离开TVB，愈讲愈心酸。唔使担心㖞，周星驰《少林足球》其实攞过金像奖影帝，不过都系离开电视台之后嘅事！